Property swindler, kalaboso
Isang hinihinalang swindler ang inaresto ng National Bureau of Investigation (NBI) matapos na makapanghikayat ng indibiduwal na bumili ng bahay at lupa na hindi nito pag-aari.
Kinilala ni NBI Director General Dante Gierran ang suspek na si Danilo Candaba, na napag-alamang matinik na manunuba sa Metro Manila.
Kinasuhan si Candaba sa Las Pinas Prosecutor’s Office ng estafa, falsification of public documents, perjury, at paglabag sa Republic Act 6425, Dangerous Drugs Act of 1972.
Inaresto ang suspek sa entrapment operation ng NBI’s Anti-Organized and Transnational Crime Division (NBIAOTCD) sa Las Piñas, nitong Martes.
Nag-ugat ang operasyon sa sumbong laban kay Candaba, na umano’y tumanggap ng P1.5 milyon mula sa biktima para sa house and lot sa Las Piñas.
Ipinagdiinan ng complainant na napagkasunduan nila ng suspek na bibilhin niya ang P2.3 milyong ari-arian makaraang magpresenta ng Special Power of Attorney (SPA), na nagpapakita na may karapatan si Candaba na ibenta ang lupain.
Matapos na ibigay sa suspek ang P1.5 milyon bilang paunang bayad, nagsimula nang magkumpuni ang complainant sa nasabing pag-aari.
Gayunman, dumating si Rowell Capal at ipinakilala ang kanyang sarili bilang tunay na may-ari ng bahay at lupa.
Sinabi ni Capal sa complainant na hindi niya ipinabebenta kay Candaba ang ari-arian at ang orihinal na titulo nito ay nasa kanya.
Dahil dito, nagpasaklolo ang complainant sa NBI upang arestuhin ang suspek.
Isinagawa ang entrapment operation dahil nanghihingi ang suspek ng karagdagang P45,000 para sa ari-arian.