Barriga, aatake sa IBF title bout kay Licona

PLANO ni Mark Anthony Barriga na maagang umatake kapag sumagupa siya kay Mexican Carlos Licona sa kanilang laban para sa bakanteng IBF minimumweight crown sa Disyembre 1 sa Staples Center sa Los Angeles, California sa United States.

Kasalukuyang nagsasanay ang 2012 London Olympian na si Barriga sa Survival Camp sa Magallanes, Cavite at naghahanda sa pinakamalaking laban sa kanyang buhay.

Magsisilbing undercard ang laban nina Barriga at Licona sa depensa ni WBC heavyweight champion Deontay Wilder ng US laban kay dating undisputed heavyweight titlist Tyson Fury ng United Kingdom na ipalalabas sa pay-per-view ng USA Showtime.

“Kailangang umatake din siya,“sabi ng chief trainer ni Barriga na si Joven Jimene. “Hindi puwedeng sa depensa lang umasa.”

May kartada si Barriga na perpektong 9 na panalo, 1 lamang sa pamamagitan ng knockout kumpara kay Licona na may 13 panalo na may 2 knockouts kaya hindi nagkakalayo ang kanilang mga rekord.

Sinabi ni Jimenez na handang-handa na si Barriga sa loob ng 12 rounds kaya nagbawas na sila ng sparring.

“Nasa 8 rounds na lang kami ngayon,” diin ni Jimenez na nangangasiwa sa karera ni Barriga kasama si IBF super flyweight champion Jerwin Ancajas. “Na-feel ko lumakas siya.”

Naging mandatory contender ng IBF si Barriga nang talunin si two-time world title challenger Gabriel Mendoza ng Colombia via 12-round unanimous decision noong nakaraang Mayo 13 sa SM City North Skydome sa Quezon City samantalang naging WBO Latino minimumweight champion si Licona nang talunin sa puntos si world rated Janiel Rivera ng Puerto Rico noong Abril 7, 2018 sa Cancun, Mexico.