AUV, NAG-DIVE MULA 3RD FLOOR
Driver na biyenan ni Sen. Poe, sugatan
Sugatan ang 83-anyos na biyenang lalaki ni Senator Grace Poe-Llamanzares makaraang mahulog mula sa elevated parking space ng isang shopping mall sa Barangay Greenhills, San Juan City ang kanyang minamanehong Asian utility vehicle (AUV), kahapon ng umaga.
Isinugod sa Cardinal Santos Medical Center si Dr. Teodoro Paraiso Llamanzares, residente ng Northeast Greenhills, San Juan, upang malapatan ng lunas.
Batay sa paunang ulat ng San Juan City Police, dakong 9:45 ng umaga nang mangyari ang aksidente sa third level ng Parking 4, sa harapan ng Greenhills shopping mall sa Promenade.
Minamaneho ng biktima ang itim na Toyota Innova (AHA-8024) at paparada pa sana nang bigla na lang umanong umarangkada ang sasakyan hanggang sa tuluyang lumusot sa bakal na railing ng parking space, at nahulog sa kalsada, sa harapan ng mall.
Unang tumama sa sementadong kalsada ang unahang bahagi ng sasakyan, saka ito bumagsak nang patihaya.
Nagkayupi-yupi ang AUV dahil sa taas ng pinagbagsakan nito, habang sira rin ang mga bakal na rehas ng parking space na nilusutan ng sasakyan.
Kuwento ng mga nakasaksi sa insidente, nagulat sila sa lakas ng pagbagsak ng sasakyan sa kalsada, at inakala pa nga nila noong una na may bombang sumabog sa lugar.
Kaagad namang rumesponde sa lugar ang mga tauhan ng San Juan Police Community Precinct 1 (PCP-1) at ang management ng mall at isinugod sa pagamutan si Llamanzares.
Kinumpirma naman mismo ni San Juan City Police chief, Senior Supt. Dindo Reyes, na biyenan ng senadora ang biktima, ama ni Neil Llamanzares.
Habang isinusulat ang balitang ito ay nasa emergency room pa ang biktima, bagamat stable na ang kondisyon nito, ayon kay Senior Supt. Reyes.
Mag-isa lang sa sasakyan si Llamanzares nang mangyari ang aksidente, at masuwerteng walang tinamaan o nabagsakan nang nahulog ang AUV sa harap ng mall.
Inaalam pa rin ng mga awtoridad kung human error o mechanical failure ang dahilan ng insidente.