GRAB DRIVER, LUMUNOK NG SHABU
Nagawang lunukin ng isang Grab driver ang mga ebidensiyang gagamitin laban sa kanya matapos siyang maaresto sa buy-bust operation sa loob ng isang apartelle sa Quezon City, nitong Linggo ng gabi.
Kinilala ni Quezon City Police District (QCPD)-Station 7 chief, Supt. Giovanni Caliao ang naaresto na si Kristofer Gavino, 35, ng Sampaloc, Maynila.
Nauna rito, ilang buwan nang tinitiktikan ng pulisya si Gavino makaraang matukoy bilang newlyidentified drug personality na nagtutulak umano ng ilegal na droga sa Cubao.
Batay sa police report, bumili ng P500 halaga ng shabu ang isang undercover na pulis mula kay Gavino sa loob ng isang silid sa apartelle sa P. Tuazon Boulevard sa Barangay San Roque, dakong 9:00 ng gabi.
Matapos ang transaksiyon, kaagad na dinampot ng mga awtoridad si Gavino.
Ayon kay Senior Insp. Ramon Aquiatan, hepe of PS-7 Drug Enforcement Unit, nilunok umano ni Gavino ang hindi natukoy na dami ng shabu makaraang mapagtanto na pulis at poseur buyer ang katransaksiyon nito.
Dahil dito, nasa siyam na maliliit na heat-sealed sachet ng shabu lang ang nakumpiska nila mula sa suspek, bukod pa sa P500 marked money, at isang mobile phone.
Samantala, sinabi naman ni Grab Philippines Public Affairs Head Leo Gonzales sa isang pahayag na awtomatiko nang deactivated si Gavino sa kanilang platform, at idinagdag na ang Grab “will not take things like this lightly”.
Matapos makumpirma ang pagkakasangkot ni Gavino sa droga, sinabi ni Gonzales na ang suspek ay magiging “perpetually banned” at maba-blacklist na sa Land Transportation Franchising and Regulatory Board (LTFRB), kaya hindi na ito pahihintulutan pang magmanaho ng anumang pampasaherong sasakyan.
“We will conduct further investigation internally and see if the operator has any liability. Grab will not take things like this lightly. The safety of our passengers and drivers is of uttermost importance,” sabi ni Gonzales.