PH-China paiigtingin pa sa state visit ni Xi Jinping ngayon
Inihanda na kahapon ang mga bandila ng China, mga tent, at monobloc na upuan para sa mga Pinoy at Chinese media, sa loob ng Malacañang compound kahapon.
Ito kaugnay ng pagdating sa bansa ni Chinese President Xi Jinping ngayong Martes para sa isang makasaysayang state visit sa Pilipinas.
Ngayong araw inaasahang darating sa bansa si Xi para sa dalawang araw na pagbisita mula sa kanyang pagdalo sa APEC Economic Leaders’ Meeting (AELM) sa Papua New Guinea.
Ito na ang unang pagkakataong bibisita sa Pilipinas ang isang Chinese president sa nakalipas na 13 taon.
Pagdating pa lang sa bansa ay kaagad na magtutungo si Xi sa Rizal Park sa Maynila upang mag-alay ng bulaklak bago magtungo sa Malacañang kung saan ito sasalubungin ng mga opisyal ng pamahalaan.
Pipirma muna si Xi sa nakalaang guest book ng Palasyo bago ito magkaroon ng pagkakataon ang mga mamamahayag na kunan siya ng litrato sa kanyang bilateral meeting kay Pangulong Rodrigo Duterte.
Bago sumapit ang gabi, sasaksihan nina Xi at Duterte ang isasagawang pirmahan o palitan ng kasunduan sa pagitan ng mga gobyerno ng China at Pilipinas.
Pagkatapos nito, magbibigay sila ng joint press statement.
Itinakda rin ang restricted meeting at palitan ng regalo kinagabihan sa idaraos na State Banquet, kung saan inaasahang magtatalumpati ang dalawang lider ng dalawang bansa.
Kinabukasan (Miyerkules) ay makikipagkita naman si Xi kina
Senate President Tito Sotto at House Speaker Gloria Macapagal Arroyo sa Taguig City.
Makikipagpulong din si Xi sa grupo ng mga lider ng Filipino-Chinese Community bago ito umalis ng bansa pabalik ng China, kinahapunan.
Kaugnay nito, magkakaroon din ng komprehensibong talakayan sina Xi at Duterte kaugnay ng major goals ng mga ito upang maiangat pa ang relasyon ng Manila at ng Beijing.
“I am visiting this time mainly to have in-depth discussions with President Duterte on how to elevate our all-round cooperation under new circumstances and make overall plan for greater progress in our relationship toward a higher level. There are a number of things we need to do if we are to achieve this goal,” bahagi ng pahayag ni Xi na inilabas ng Chinese Embassy sa Maynila, kahapon.