Aksidente ng biyenan ni Poe, sisilipin ng San Juan

Paiimbestigahan ng lokal na pamahalaan ng San Juan City ang pagkakahulog ng sasakyan ng biyenan ni Senator Grace Poe mula sa ikatlong palapag ng elevated parking lot ng isang shopping mall sa Greenhills, San Juan nitong Linggo, upang matukoy kung may pananagutan sa insidente ang pamunuan ng mall.

Ayon kay San Juan City Police chief Senior Supt. Dindo Reyes, naghain na ang city council ng resolusyon para maimbestigahan ang insidente.

“Sa ngayon po, ang city council ng San Juan, magpapatawag ng resolution in aid of investigation para malaman kung mayroong pagkukulang ang Greenhills,” sinabi ni Reyes sa panayam sa radyo. “Iimbestigahan rin po natin kung may pagkukulang ang mall.”

Dakong 9:45 ng umaga nitong Linggo at ipaparada sana ni Dr. Teodoro Llamanzares, 83, biyenan ng senadora, ang kanyang itim na Toyota Innova sa 3rd level ng naturang parking lot nang magdire-diretso ang sasakyan hanggang sa tuluyang bumagsak sa sementadong kalsada.

Mabuti na lang umano at nakaseatbelt ang biktima nang mangyari ang aksidente, kaya hindi naging matindi ang tinamo nitong pinsala, at nasa maayos nang kondisyon sa kasalukuyan sa Cardinal Santos Medical Center.

Ayon kay Reyes, batay sa inisyal na imbestigasyon nila ay napuna niya ang ilang isyu tungkol sa iisang stopper, sa halip na dalawa, gayundin sa GI pipe barriers sa parking lot.

“May stopper po dun sa sahig. Ang pagkaka-obserba po ang stopper ay iisa. ‘Di ba supposed to be dalawang stopper bawat gulong? Isa lang po ang nakalagay doon,” ani Reyes. “Nakita ko po yung GI pipe yung barrier na nakalagay doon. Iniimbestigahan ngayon ng Greenhills management kung kulang ba itong kanilang nailagay.”