Manila Post Office, Nat’l Cultural Treasure

Mapapabilang na sa mga kinikilalang lugar sa Pilipinas ang gusali ng Manila Central Post Office, na sumisimbolo sa mayamang kultura at kasaysayan ng bansa, matapos na pormal itong ideklara bilang “Important Cultural Property” (ICP) ng National Museum.

Nabatid na ang National Museum ay may mandato na magdeklara ng mga ari-arian sa Pilipinas na karapat-dapat na gawing ICP o National Cultural Treasure, na sinususugan ng mga batas tulad ng Republic Act No. 4846 (Cultural Properties Preservation and Protection Act), na inamyendahan ng Presidential Decree No. 374, PD 260, RA 8492 (National Museum Act of 1998), at ang bagong RA 10066 (National Cultural Heritage Act of 2009).

Labis naman itong ikinatuwa at ipinagpasalamat ni Postmaster General Joel Otarra.

Ayon kay Otarra, ang Philippine Postal System ay may mahalagang papel sa kasaysayan ng bansa.

Itinatag ng mga Kastila noong 1767, itinayo sa Escolta ang kauna-unahang tanggapan nito, malapit sa Estero de la Reina at Santa Cruz Church.

Nang dumating ang mga Amerikano noong 1926, itinayo ang Post Office Building sa Maynila, malapit sa Pasig River noong 1926 bilang isang modernong kolonyal na arkitektura, isang halimbawa ng neo classical na monumento na idinisenyo ng mga Pinoy architect na sina Juan Arellano at Tomas Mapua.

Muli itong itinayo matapos ang World War II, at dahil napanatili ang tibay at ganda, binuksan sa gusali ang Philippine Postal Corporation (PHLPost), sa pakikipagtulungan ng National Commission for Culture and Arts (NCCA).

Nataon naman ang deklarasyon sa pagdiriwang ng Serbisyo Postal para sa ika-251 anibersaryo nito, at ng National Stamp Collecting Month ngayong Nobyembre.