Grade 11, kaibigan huli sa shoplifting
Dinakma ang isang Grade 11 student at ang kaibigan nito nang mahuli umanong nagnanakaw sa isang supermarket sa Valenzuela City, kamakalawa ng hapon.
Kinilala ang suspek na sina Haidee Angeles, 21; at alyas Marina, 17, kapwa ng Pulong Buhangin Sta. Maria, Bulacan.
Sa ulat ng Valenzuela Police, pumasok ang mga suspek at nagkunwaring kustomer sa supermarket na nakabase sa KM 419 Mac Arthur Highway, Barangay Dalandanan, Valenzuela City, bandang 2:30 ng hapon.
Umikot ang magkaibigan at kumuha ng mga damit saka nagpunta sa fitting room para isukat.
Napansin ni Myrna Carbonel, civilian security guard, na masyadong maraming damit na kinuha ang dalawa kaya palihim niya itong sinundan.
Paglabas ay napansin ni Carbonel na dumami ang laman ng bag ng estudyante kaya sinita.
Nakuha sa bag ang iba’t ibang accessories, damit at tsokolate, na aabot sa kabuuang P3,228.
Agad na tumawag ang pamunuan ng supermarket sa Police Community Precinct (PCP) 6, at dinala sa presinto ang mga suspek.
Si Alvin Fernando, 27, store team leader, ang kakatawan bilang complainant at kinasuhan ang mga suspek ng roberry (shoplifting).
Idiniretso sa Valenzuela City Detention Cell si Hiedee, habang si Marina ay dinala sa Valenzuela City Social Welfare Development Child Protection Center.