Nationwide river cleanup sa loob ng 1 taon, ipinag-utos

IPINAG-UTOS ni Department of Environment and Natural Resources (DENR) Secretary Roy Cimatu nitong Huwebes sa lahat ng regional directors ng ahensiya na linisin ang lahat ng ilog na nasa kanilang pamamahala sa loob ng isang taon.

Ipinag-utos ito ni Cimatu kasabay ng pagbubukas ng 4th International River Summit sa Radisson Blu Hotel.

Ayon sa Kalihim, responsibilidad ng DENR na maiayos ang kondisyon ng mga ilog sa bansa kaya binibigyan niya ang lahat ng mga pinuno ng mga regional office ng isang taon para aksiyunan ang kanyang direktiba.

Aniya, iisa-isahin niya ang lahat ng mga ilog sa bansa sa loob ng anim na buwan at ang rehiyon na may pinakamalinis na ilog ay pararangalan at bibigyan ng pagkilala.

Habang ang mga direktor na mabibigong tumugon sa kautusan, ayon kay Cimatu, ay dadaan sa isang evaluation process para sa kanilang naging gawain at maaaring maharap sa parusa o papalitan.

Ang International River Summit ay biennial multi-partner na inisyatibo, na inorganisa upang mapaigting ang pagsusulong ng paglilinis ng ilog at sa pamamahala.

Pinamunuan ni Mandaue City Mayor Luigi Quisumbing ang ribbon-cutting at pagbubukas ng seremonya, na dinaluhan din ni Cimatu at Cebu Archbishop Jose Palma.

Ang ikaapat na edisyon ng Summit ay pamumunuan ngayong taon ng pamahalaan ng Mandaue City, sa pakikipagtulungan sa League of Cities of the Philippines at DENR-River Basin Control Office.

Sa temang “Raising Awareness, Commitment, and Resources for the Rivers,” layunin ng Summit na makapagbigay ng lugar para sa pagpapalitan ng impormasyon at kaalaman sa mga bagong teknolohiya at ang bago sa pamamahala, pagtatalakay sa mga isyu at pagbabahagi ng mga inobasyon at solusyon na magagamit na estratehiya at paraan sa pamamahala ng ilog.

Ang rehabilitasyon ng Butuanon River ang ilan lamang sa mga tinalakay sa tatlong araw na summit.