8 sa 10 Pinoy, nais igiit ang soberanya at karapatan ng PH sa WPS
MULI, kung naniniwala kayo sa survey, may 84% ng mga Pilipino ang nagsasabing dapat kumibo, magsalita, at igiit ng Duterte administration na pagaari at saklaw ng ating Exclusive Economic Zone (EEZ) ang mga reef na inookupahan ngayon ng dambuhalang China.
Batay sa ginawang survey ng Social Weather Stations (SWS), walo sa 10 Pilipino ang nagsasabing dapat sabihin ni President Rodrigo Roa Duterte (PRRD) kay Chinese Pres. Xi Jinping na talagang atin ang mga reef at shoal na okupado nila ngayon. Isipin na lang na itinataboy ng Chinese Coast Guard ang mga mangingisdang Pinoy sa mga lugar na dati nilang pinangingisdaan sa loob ng daan-daang taon.
Sa SWS survey, lumilitaw na mataas pa rin ang kumpiyansa at paniniwala ng mga mamamayan sa US kumpara sa China. Nagtataka lang ang mga Pinoy kung bakit parang hindi ito iniintindi ni PRRD gayong malimit niyang sabihin na ang kagustuhan at kagalingan ng sambayanang Pilipino ang kanyang nasa isip at puso bilang presidente ng Pilipinas.
Sinabi nina Sen. Risa Hontiveros at ex-Solicitor General Florin Hilbay na dapat pakinggan ng administrayong Duterte ang general sentiment ng ating mga kababayan na ipagtanggol ang ating soberanya at territorial rights sa West Philippine Sea. Kung talagang kaibigan daw ni PDu30 si Pres. Xi, tiyak na pakikinggan at pagbibigyan siya nito.
Hindi sila kumporme sa laging sinasabi ng ating Pangulo na hindi natin kayang makipaglaban sa China dahil mahina ang ating militar. Ang nais ng mga mamamayan ay ihayag ng Pangulo na atin ang mga teritoryo sa WPS, magprotesta ang gobyerno upang malaman ng mga bansa sa mundo na iginigiit natin ang mga karapatan sa karagatan. Hindi nangangahulugan na ang protesta ay pakikipaggiyera.
oOo
Tiniyak ng Malacañang na hindi darakpin ang National Democratic Front (NDF) negotiators na sina Fidel Agcaoili at Luis Jalandoni kapag sila’y bumalik sa Pilipinas upang makipag-usap ng kapayapaan sa pamahalaang Duterte.
Ayon kay Presidential Spokesman Salvador Panelo, walang batayan ang pangamba ni Jalandoni na aarestuhin ito pagdating sa bansa. Kinansela ng communist negotiators ang planong biyahe sa ‘Pinas na ang layunin ay maisulong ang natigil na usapang-pangkapayapaan.
Ayon kay Jalandoni, ang biyahe niya at ni Agcaoili ay hindi na matutuloy dahil sa pahayag ni Department of Interior ang Local Government (DILG) Sec. Eduardo Año na ipaaaresto ang dalawa maliban lang kung iuutos ni PRRD na huwag silang dakpin. Iginiit ni Panelo na ang pangamba ni NDF leader Luis Jalandoni na siya’y darakpin pagdating sa Pinas ay “misplaced”.
oOo
Pinagtibay ng Kamara noong Martes ang panukalang P3.757trilyon pambansang budget para sa 2019.
Sa hanay ng mga mahistrado ng Korte Suprema, si SC Associate Justice Francis Jardeleza ang pinakamayaman samantalang si Associate Justice Leonen ang pinakamahirap.
Batay sa summary ng 2017 Statements of Assets, Liabilities and Networth (SALN), si Jardeleza ay may networth na P261,076,233.24, samantalang si Leonon ay may networth na P2,964,314.57.
Sino naman kaya ang pinakamayaman sa Kamara at sa Senado?