PAGDALO NI NORA, ‘DI PA RIN SURE
Rayver, isa sa best men sa wedding ni Lotlot
SINAMANTALA na ng mga bumisitang press sa set ng Asawa Ko Karibal Ko na makakuha ng update mula kay Lotlot de Leon, isa sa cast ng top Afternoon Prime teleserye ng GMA, tungkol sa nalalapit niyang kasal next month.
Hindi naman nagkait ng details si Lotlot, na ikakasal sa Lebanese fiancé niyang si Fadi El Soury sa December 17.
“Ninenerbyos ako talaga dahil nang una akong ikasal (kay Ramon Christopher
Gutierrez), wala akong kinalaman doon,” natatawang pag-amin ni Lotlot. “Parang umattend lang ako sa kasal. Bata pa kami noon ni Monching. Pero this time ako lahat, mula sa invitations, giveaways, venue, sa damit at kung anu-ano pa, ako talaga.”
Sa isang beach resort sa Batangas ang wedding nina Lotlot at Fadi sa December 17, at ang only son niyang si Diego ang maghahatid sa kanya sa altar. Maids of honor niya ang tatlong anak na sina Janine, Jessica at Maxine, at ang kapatid na si Matet de Leon—na hindi pumayag na hindi siya kasama sa maids of honor.
Ang brothers niyang sina Ian, Kiko
at Kenneth de
Leon at ang best friend ni Fadi ang groomsmen. Bridesmaids naman ni Lotlot ang three biological sisters niya na darating mula sa Amerika. Hindi nga lang makararating ang American father niya, si Donald Lee
Olson, dahil hindi ito pupuwedeng magbiyahe nang malayo matapos na operahan sa likod.
Pero wish ni Lotlot na dumating ang kanyang Mama Guy (Nora Aunor), bagamat sure na darating ang kanyang Daddy Christopher de Leon, na excited na sa muling pagpapakasal ng eldest daughter nito. Kasama ni Boyet ang buong family niya sa pagdalo sa wedding ni Lotlot.
“Modern rustic ang theme ng garden wedding, civil wedding ceremony, so isang government official ang magkakasal sa amin. Hindi pa ako nakikipag-usap sa puwedeng magkasal sa amin,” kuwento ni Lotlot.
May nag-suggest na bakit since sa Batangas sila, hindi niya kausapin si Congresswoman Vilma Santos, para ito na lang ang magkasal sa kanila. Biniro tuloy si Lotlot na kung ang aktres na kongresista ang magkakasal sa kanila at darating si Mama Guy niya ay kumpleto na ang kasal niya, may Nora na may Vilma pa!
Biniro rin si Lotlot kung may participation ba sa kasal si Rayver Cruz, na sinasabing boyfriend ng anak niyang si Janine. Magkasama sa Asawa Ko, Karibal Ko sina Lotlot at Rayver. At inamin ni Lotlot na isa si Rayver sa mga best men.
Sa teleserye, gumaganap si Lotlot bilang si Lupita, ang mabait na ina ni Rachel, played by Kris Bernal, na love interest naman ni Rayver. Napapanood ang Asawa Ko, Karibal Ko from Mondays to Saturdays, after Eat Bulaga.