‘Treason’ sa oil deal, pinabulaanan

Walang nangyaring “treason” nang makipagkasundo ang ating pamahalaan sa China kaugnay ng gagawing joint oil at gas exploration sa West Philippine Sea sa pagitan ng dalawang bansa.

Ito ang paglilinaw kahapon ni Presidential Spokesman Salvador Panelo kasabay ng pagdepensa niya sa naging puna ng communist leader na si Jose Maria Sison kaugnay ng usapin.

Ang reaksiyon ni Panelo ay kasunod ng paglalabas ng Malacañang bng kopya ng “Memorandum of Understanding on Cooperation on Oil and Gas Development between the Philippines and China” sa gitna ng panawagang magkaroon ng transparency sa nasabing kasunduan.

Sa naturang kasunduan, na pinirmahan nitong nakaraang linggo, nagkasundo ang dalawang bansa na magkaroon ng pag-uusap kaugnay ng “accelerated basis arrangements” upang mapadali ang pagsasagawa ng “oil and gas exploration and exploitation in relevant maritime areas consistent with applicable rules of international law”.

Kasabay din ito ng pagtatatag ng inter-governmental joint steering committee na kinakatawan ng dalawang bansa, upang matalakay ang “cooperation agreement at maritime areas” para sa tuluyang pagssasagawa ng oil at gas exploration.

Nakapaloob sa kasunduan na dapat maisagawa ang energy deal sa loob lamang ng 12 buwan, o isang taon.

“It’s just an agreement to agree on certain things. There is nothing there that will be a basis for any allegation of treason. Even the critics say there is nothing there,” paglalahad pa ni Panelo nang humarap siya sa pulong balitaan sa Palasyo kahapon.