Katauhan sa pagkamakabayan

NATITIYAK ko na hindi magpapaumat-umat si Pangulong Duterte sa paglagda sa isang Memorandum Order (MO) na muling

magpapatupad ng Reserve Officers and Training Corps (ROTC) sa mga pribado at pampublikong kolehiyo at pamantasan sa buong kapuluan. Kaakibat ito ng pagbibigay-diin na ang naturang asignatura ay kailangang maging bahagi ng school curriculum; nakaangkla ito sa kahalagahan ng ROTC sa pagkikintal ng tunay na diwa ng pagkamakabayan at disiplina sa puso at isip ng mga kadete.

Isang malaking kabalintunaan na ang palalabasing MO ay mistulang gumising sa ating mga mambabatas sa pagsusulong ng mandatory ROTC law. Natauhan sila marahil sa pahayag

ng Pangulo. Ngayon, nagkukumagkag sila upang aksiyunan ang 18 panukalang-batas at mga resolusyon hinggil sa sapilitang pagpapatupad ng nabanggit na military training.

Nagugunita na ang ROTC ay biglang ipinatigil sa mga paaralan bunsod ng sinasabing pagpatay kay Mark Welson Chua ng University of Santo Tomas; dahil umano ito sa pagbubunyag ng mga katiwalian sa military training na kinasasangkutan ng ilang ROTC officers.

Mula noon, ipinatupad ang National Service Training Program (NSTP) bilang kapalit ng ROTC.

Subalitlumilitawnaitoayhindisapat upang matamo ang makabuluhang pagsasanay at pagseserbisyo na naibibigay ng ROTC.

Hindi ko malilimutan ang makatuturang pakinabang na natatamo sa ROTC. Epektibo itong katuwang sa mga gawain hinggil sa pangangalaga sa kalikasan, katahimikan, lalo na kung tayo ay dinadalaw ng mga kalamidad.

Hanggang ngayon, ang ilan sa ating mga kapanahon ay nananatiling bahagi ng reserve force laban sa mga karahasang gumagambala sa ating katahimikan.

Bigla kong naalala ang ating mga bayaning ROTC Hunters na naging bahagi rin ng pakikidigma sa mga mananakop.

Kung hindi ako nagkakamali, isang dating Chief of Staff ng Armed Forces of the Philippines (AFP) ang nagmula sa hanay ng ROTC. At maraming iba pang officers ang produkto ng naturang military training.

Ilan lamang ito sa sapat na mga dahilan upang buhayin ang mandatory ROTC sa pagkikintal ng nasyonalismo at disiplina sa ating mga kabataan.