Basura ng South Korea, basura ng Canada

HINDI pa naman pala pinal ang mga kasunduan o memorandum of agreement/understanding na nilagdaan ng Pilipinas at China nang bumisita si Chinese Pres. Xi Jinping noong Nobyembre 20-21, 2018. Ubra pang umurong.

Sa pahayag ng Malacañang,

puwedeng umatras ang ating bansa kapag nasuri at nalamang hindi advantageous o bentahe sa PH ang nasabing mga kasunduan. Samakatwid, de-lastiko ang mga MOUs at MOAs na nilagdaan ng dalawang bansa, tulad ng kasunduan sa magkasanib na oil and gas exploration sa West Philippine Sea (WPS). Sana ay hindi madisgrasya ang ‘Pinas sa situwasyong ito.

oOo

Hindi katulad ng Canada na ang pangulo ay hinangaan ng mga Pinoy nang dumalo ito sa APEC summit noong panahon ni ex-Pres. Noynoy Aquino dahil magandang lalaki si Pres. Justin Trudeau, nangako ang South Korea na kukunin at ibabalik sa kanilang bansa ang may 5,000 metric tons na basurang itinambak

sa Tagaloan, Misamis Oriental sa pamamagitan ng Mindanao International Container Terminal. Hindi pogi si SK Pres. Moon subalit pogi ang kanyang budhi.

Hanggang ngayon, nasa bansa pa ang tone-toneladang basura. Ayon sa South Korea Embassy, iniimbestigahan na ngayon ng Korean customs authorities at ng Foreign Ministry ang exporter na nagpadala ng buntun-buntong basura sa ‘Pinas.

oOo

Ilang beses na rin akong nakaranas ng Thanksgiving Day sa United States. Malamig na talaga sa bansa ni Uncle Sam kapag Araw ng Pasasalamat. Inihayag ng US National Weather Service na ang 2018 Thanksgiving Day sa US ngayon ang

pinakamalamig sapul noong 1901.

Ayon sa NWS, ang temperatura sa New York City ay nasa pagitan ng -3.9 at -6.7 degree celsius at may hanging 32.2 kph na ang bugso ay 43.3 kph. Noong 1901, ang pinakamalamig na Thanksgiving Day ay 3.33 C. Ang pinakamalamig na nairekord ay noong 1871 na -5.5 C. Pinayuhan ng New York City authorities ang mamamayan na magsuot ng makakapal na damit na angkop sa panahon ng winter o taglamig.

Sa puntong ito, may nag-email sa akin na kung sa America ay may Araw ng Pasasalamat (Thanksgiving Day), sa minamahal daw ba nating Pilipinas ay may dapat ding ipagpasalamat? Siyanga ano. Meron ba tayong dapat ipagpasalamat ngayong mataas ang presyo ng mga bilihin, patuloy sa

pananagasa ang TRAIN law, kulang ang supply ng bigas, libu-libong pushers at users na ang naitumba, pero ang salot na illegal drugs ay naririto pa, at nakalulusot pa rin ang tone-toneladang shabu sa Bureau of Customs (BoC) at mga pantalan?

oOo

Tuloy pa rin kaya ang illegal drug trade sa New Bilibid Prisons (NBP) at iba pang mga bilangguan? May drug laboratories pa rin ba sa mga high-end subdivision? May mga Philippine National Police (PNP) official pa rin ba na protektor ng drug lords at smugglers, gayong dinoble na ni PRRD ang kanilang sahod? Tutulong kaya si Chinese Pres. Xi Jinping kay kaibigang Duterte sa pagsugpo sa shabu smuggling na galing sa Mainland China?