Ayaw makipagsex, kinatay

ILIGAN CITY – Patay na nang matagpuan si Myra M. Hugo, 31, single mother at residente ng Purok 10 Cayometo Street, Barangay Santiago, sa labas ng bahay ni Chilet Dingcong Pinque sa Purok Katilingbanon sa Bgy. Ubaldo Laya, nitong Sabado ng gabi.

Nadatnan ng rumespondeng mga pulis ang babaeng duguan. Ito ay nagtamo ng mga sugat sa kanyang kaliwang pulso, tatlo sa kanyang dibdib at isa sa ibabang bahagi ng kaliwang tenga.

Sa imbestigasyon, kinilala ang suspek na si Jeriel Ralph Dingcong Y Dumat, 18, trisicad driver, ng Benetiz compound sa Bgy. Mahayahay.

Sina Dingcong at Hugo, na kilalang magkasintahan, at isang 'di pa nakikilalang bading ay nag-iinuman sa kalapit na tindahan.

Ayon kay Police Chief Insp. James Daleon, police station 4 commander, selos ang dahilan kung bakit nagawa ng suspek ang krimen.

Dagdag pa sa imbestigasyon, gumagamit ng ilegal na droga ang suspek na nagselos dahil tumangging makipagtalik sa kanya ang nobya.

"Ang dalawa ay may relasyon, unanguna nakita natin sa motibo, ito ay selos na naghahantong sa kamatayan ng babae", ani PCINSP Daleon.

Inaresto si Dingcong nang makatanggap ng ulat mula sa isang informant, na force multiplier sa lugar, at idiniretso sa police station 4 (PS4).

Nakakulong ang suspek sa Police station 4 detention cell, Tubod, Iligan City.