20 drug personalities dinakma

Dalawampung drug personalities, kabilang ang tatlong babae, ang naaresto sa drug operations sa Caloocan, Navotas, at Valenzuela City.

Sa report kay Northern Police District (NPD) director, Police Chief Supt. Rolando Anduyan, nakatanggap ng tawag si Barangay Chairman Dwight Mance, ng Barangay 134, hinggil sa lalaking magwawala sa kahabaan ng Tirad Pass Street, Caloocan City, dakong 11:30 ng gabi.

Dinampot ng mga rumesponde si Alvin Potanio, 29, at nadiskubre ng mga barangay officials na may nagaganap na pot session sa bahay na pinagwawalaan nito at nahuli sina Ranis Mark Anthony, 32; Rachell Ann Ng, 30; Christopher Lagartera, 38; Dennis Chiong, 41; at Hazel Protacio, nasa hustong gulang.

Nakumpiska sa mga naaresto ang drug paraphernalia at dalawang pakete ng umano’y shabu.

Pagsapit ng 1:00 ng madaling araw, nahuli naman sa buy-bust operation, na ikinasa ni Police Chief Insp. Rengie Demos, head ng Station Drug Enforcement Unit (SDEU), sina Michael Poneyo, 42; Michael Sarmiento, 35; Roderick Reyes, 42; Rogelio Reyes, 45; at Michael Sildo, 38, sa Marulas B. Interior 22, Bgy. 36, Caloocan City.

Nasamsam sa kanila ang tatlong pakete ng umano’y shabu.

Sa Market 3, Fish Port, Bgy. NBBN, Navotas City, dinakma sina Benjamin Aldobe, 37; Ruel Nortea, 37; Juan Estadillo, 23; Ruby Albetina, 48; Maricar Genesis, 22; Mario Salvador, 21; at Crisanto Fernandez, 34.

Dinampot ang mga suspek habang nagsasagawa ng Anti-Criminality Law Enforcement Operation (SACLEO) ang pinagsamang puwersa ng Maritime Group at Navotas Police, bandang 2:35 ng hapon.

Narekober sa kanila ang walong pakete ng umano’y shabu.

Sa kahabaan naman ng Feliza Bukid, Bgy. Parada Valenzuela City, dinampot si Zandir Malbago, 35, at nakuha sa kanya ang isang pakete ng droga.