Dalawa hinoldap sa pawnshop
Pinasok ng dalawang holdaper ang isang pawnshop at remittance center sa Taguig City, kamakalawa ng hapon.
Inaalam pa ng awtoridad ang pagkakakilanlan ng mga suspek, na inilarawan ang isa na nakasuot ng uniporme ng guwardiya habang ang isa ay camouflage green jacket, at kapwa sakay sa motorsiklo.
Kinilala naman ang mga biktima na sina Danilo Bucsit, 57, guwardiya; Nicole Shane Lacia, 25, ng 11th Avenue, Barangay North Signal, Taguig City; at Wenceslina Roderos, 62, ng No. 305 Agila Street, G2 Village, Bgy. Pinagsama sa nasabing lungsod.
Sa ulat ng Southern Police District (SPD), naganap ang panghoholdap sa isang sangay ng Cebuana Lhuiller na matatagpuan sa Phase 2, Bgy. Pinagsama Village, sa Taguig City, bandang 1:05 ng hapon.
Nagbabantay si Bucsit nang dumating ang dalawang suspek at isa rito ang agad na pumasok at humingi ng transaction form bago lumabas sa establisyemento at tinawag ang kasama.
Sa pagpasok ng dalawang suspek, tinutukan ng mga ito ng baril ang guwardiya at dinis-armahan saka nagdeklara ng holdap.
Tumakbo umano ang mga kahera at nagtago sa loob at hinoldap ng mga suspek ang mga customer na sina Lacia at Roderos, at tinangay ang mga cell phones, ATM cards, at P7,000 cash.
Mabilis na tumakas ang mga suspek sa hindi batid na direksiyon.
Patuloy ang imbestigasyon sa insidente.