Nakaalalay sa mga susunod na mamamahayag

SA larangan ng pamamahayag ay ikinokonsidera ang BALITA na isa sa mga pangunahing tagapaghatid ng tunay at makabuluhang impormasyon sa publiko na may kaugnayan sa edukasyon, pamahalaang lokal at nasyonal.

Maging ang kaganapan sa ating kapaligiran, lalo na sa serbisyo publiko, krimen, medical services, at iba pa ay tinutukan ng BALITA.

Dati ang tanggapan ng BALITA ay nasa Pasong Tamo, Makati City, at si Marcelo Lagmay ang Editor-in-Chief. Naging NPC President din siya at naging Press Secretary sa Malacañang.

Mahigit 25 taon na akong correspondent ng BALITA sa Tarlac at Central Luzon, at naging provincial editors sina Vangie Sarenas, Pilar Milambiling, ang namayapang Danny Valdez, at iba pa.

Bilang mamamahayag ay hindi natin makalilimutan ang Journalism Seminar sa Ilocos Norte, sa panahong ang NPC president ay si Tony Antonio. Bumandera noon ang

BALITA at nagabayan ang mahigit 500 high school students sa pagsusulat ng wikang Pilipino at iba pang pagsasanay.

Maging sa relief goods operation sa mga disaster areas ay naroroon pa rin ang mga correspondents at reporters ng BALITA na dumadamay sa mamamayan sa Central Luzon, at sa iba pang bahagi ng bansa.

Nakasama ko rin bilang kapwa correspondents sina Rizaldy Comanda, Ruben Veloria, Beth Camia, Nanette Valle, Salvador Arevalo, Bobbit Palma, Light Nolasco, Lyka Manalo, Charlie Pinto, Jun Fabon, Danny Estacio, Dennis at Liezel Iñigo, Chito Calaor, Eddie Bunag, Manny Dela Cruz, Fanny Panulong, ang namayapang si Lito Cayaban, Buddy Datu, Ferdie Ramos, at iba pang bumuo sa Association of Balita Correspondents (ASBAC).

Sa araw na ito, Disyembre 1 ay ipinagdiriwang ang ika-47 anibersaryo ng BALITA na patuloy na maglilingkod sa sambayanang Pilipino, sa ilalim ng mahusay na pamamahala nina Manila Bulletin Publishing Corp. President Emilio C. Yap III, Publisher/Editor-in-Chief Cris Icban, Jr., at ng masisipag na Team Balita sa desk, na gaya ng ilang henerasyon na ng mga naglingkod sa BALITA, serbisyo publiko sa mamamayan ang pangunahing layunin nila.