Bongga ang Christmas décor, pinagmumulta
‘Tila nawala ang konsepto ng “spirit of Christmas” sa New Jersey, matapos na ibahagi ng isang mag-asawang residente ang kanilang malungkot na karanasan—pinagmulta sila dahil sa bongga nilang Christmas display.
Sinabihan umano sina Tom at Kris Apruzzi ng mga opisyal ng lungsod na kailangan nilang magmulta ng $50,000 dahil sa pagpapatuloy nila ng 15-taong tradisyon ng magarbong Christmas light display.
Ayon sa mga Apruzzi, naglalaan sila ng tatlong buwan taun-taon para sa pagde-decorate ng mahigit 300,000 pailaw sa kanilang bahay sa Old Bridge para sa holidays, ngunit ngayon ay pinagmumulta sila upang maipagpatuloy nila ang kanilang 15-taong tradisyon.
Sinabi ng mag-asawa na pinagbabayad sila ng $2,000 kada araw para sa pagpapailaw, na mapupunta umano sa police security at bus transportation, upang mabawasan ang trapikong idinudulot ng light show sa kanilang bahay.
Bagamat sinusubukan na umano ng magasawa na mangalap ng pera, plano pa rin nilang ituloy ang pagpapailaw ngayong Disyembre, makalap man nila o hindi ang kanilang target na pondo.
“I’m not taking it down,” ani Tom Apruzzi . “It’s my religious right and my first amendment right. I do this for the veterans and everything else like that. If people have a problem with that, I can’t say anything about it. There are people that are going to be happy, and there are always people that are going to be unhappy.”