‘No human contact’ sa OFWs sa airport, utos ni Digong

Wala nang “human contact” sa tuwing dadaan ang overseas Filipino workers (OFW) sa pagsisiyasat ng immigration sa mga paliparan sa bansa, idineklara ni Pangulong Rodrigo “Digong” Duterte nitong Miyerkules. Sinabi ng Pangulo na ipinag-utos niya ang mas mabilis at hassle-free immigration processing para sa OFWs, binanggit ang pagkakabit kamakailan ng self-service automated passport control gates sa Manila airport.

“Now the latest ngayon is when you go in, no more human contact. No more human contact. You just swipe your – in two minutes, i-swipe mo lang ‘yung ano mo, ‘yung visa mo, you’re out,” ani Duterte sa awarding ng outstanding overseas Filipino individuals and organizations sa Malacañang nitong Miyerkules.

“Wala nang tanong-tanong. No human contact at all. And that will be true and I am ordering it now. They have to make it faster pati ‘pag swipe palabas for all OFW workers,” aniya.

Ang tinutukoy ni Duterte ay ang Electronic Gate System (E-Gate) project ng Bureau of Immigration (BI) na naglalayong mabawasan ang mahahabang pila sa airport at pinabilis ang paggalaw ng mga taong dumarating sa bansa.

Labinwalong automatic border gates, na nagpapahintulot sa mga tao na gamitin ang kanilang electronic passports sa pagpasok sa bansa, ang ikinabit sa Ninoy Aquino International Airport, Cebu Mactan at Davao international airports.

Bukod sa mabilis na passport processing, sinabi ng Pangulo na inatasan niya ang airport authorities na umiwas sa pagbubukas ng mga bag sa airport.

“I don’t allow the opening of bags in the airport kung mag-uwi lalo na ‘yung mga mahihirap talaga. It pisses me to no end,” aniya.