Sindikato nalansag: Lider tepok, 6 naaresto
Pinaniniwalaang nabuwag na ng National Capital Region Police Office (NCRPO) at Makati City Police ang umano’y isang criminal group, makaraang masawi ang sinasabing lider nito, at dalawa pa at nasugatan sa engkuwentro, habang anim ang naaresto, sa Makati City, nitong Miyerkules ng gabi.
Sa ulat ng NCRPO, nakilala ang napatay na si Rolando Abundo Jr., alyas “Bagyo”, ng P. Taylo St., Barangay Pio del Pilar, Makati.
Ginagamot naman sa Pasay City General Hospital sina Zea Xyrille Ramos at Susan Ramos, parehong nasa hustong gulang, dahil sa tinamong mga tama ng bala sa katawan.
Arestado naman ang iba pang miyembro ng grupo na sina Rixon Pantoja, Zyvastian Ramos, Danilo Dy, Roy Protacio, Leonell Lumberio, at Mark Greg L. Lajoy, pawang nasa hustong gulang.
Ayon sa NCRPO, nagsilbi ng search warrant ang mga tauhan ng Regional Drug Enforcement Unit (RDEU) at ng Makati Police laban sa suspek na si Abundo sa kanyang bahay sa Bgy. Pio del Pilar, sa nasabing lungsod, dakong 8:30 ng gabi.
Bigla umanong bumunot ng baril at nagpaputok si Abundo dahilan ng pagganti ng putok ng mga pulis na ikinasawi nito at ikinasugat ng dalawa pa nitong kasamahan.
Nasamsam umano ng mga awtoridad sa loob ng bahay ni Abundo ang ilang pakete ng hinihinalang shabu na nasa 500 gramo at nagkakahalaga ng P3,400,000, drug paraphernalia, ilang high-powered firearms, at low-powered firearms, mga granada, at hindi nabanggit na cash na pinaniniwalaang kita sa ilegal na droga.
Sa background check, sinasabing sangkot ang ang grupo ni Abundo sa drug trafficking at gun-forhire activities, na kumikilos sa katimugang Metro Manila at sa Cavite.
Kakasuhan ng paglabag sa Comprehensive Dangerous Drugs Act (RA 9165), at illegal possession of firearms and ammunitions ang mga naarestong suspek.