Balangiga Bells sa Nat’l Museum, pinalagan

Tutol ang obispo at mga clergy ng Diocese of Borongan sa panukalang ilagak ang isa o lahat ng tatlong makasaysayang Balangiga Bells sa National Museum.

Sa isang pahayag, sinabi ng diocese na kawalang-galang at pagsira sa kasaysayan ang panukalang ilagak sa National Museum ang mga kampana, alinsunod sa Senate Resolution No. 965.

Giit ng diocese, ang mga naturang kampana ay nararapat na ibalik lahat sa parokya ng Saint Lawrence, Deacon and Martyr sa Balangiga, Eastern Samar, na siyang tunay na tahanan nito.

“We, the Bishop and Clergy of the Diocese of Borongan collectively object to and strongly stand against the transfer of one or all of the bells of Balangiga from their historical and rightful habitat,” saad sa pahayag ng diocese. “Any effort aimed at such a transfer is a disrespectful mangling of history and the right of the Catholic faithful of Balangiga to their private property.”

Nanindigan pa ang diocese na isang kabastusan sa kasaysayan at maging sa sagradong karakter at layunin ng Balangiga Bells, ang naturang resolusyon ng Senado.

Itinuturing rin ng diocese na sagradong artefact ang tatlong kampana, na humahalina sa mga mananampalataya para sa sakramento ng banal na Eukaristiya, kaya dapat itong maibalik sa simbahang pinanggalingan nito at hindi sa National Museum.

Samantala, para naman kay Archbishop Romulo Valles, pangulo ng Catholic Bishops’ Conference of the Philippines (CBCP), ang pagbabalik sa bansa ng mga kampanya ay isang magandang pagkakataon upang higit na maunawaan ang kasaysayan.

“It also demonstrates that the path to healing and reconciliation may be arduous but is never impossible,” ayon pa kay Valles.