Pagkilala sa Davao City sa pagsusulong ng programang pangkalusugan
APAT na parangal ang iginawad ng Department of Health (DoH) sa City Health Office (CHO) ng Davao City para sa mga programa nito laban sa malnutrition at filariasis. Ayon kay Dra. Josephine Villafuerte, CHO chief, ang Compendium at Pag-asa award ay iginawad sa local health office ng s’yudad para sa kanilang matagumpay na programa para sa nutrisyon at paglaban sa filariasis.
“This only means that we are successful with our programs and we made it sustainable all throughout,” ani Villafuerte.
Sa malnutrisyon, sinabi niyang nagtatag ang s’yudad ng rehabilitation program para sa severe at acute malnutrition na kalimitang ipinatutupad sa mga lugar na sinalanta ng kalamidad o mga naiipit sa mga kaguluhan.
Ibinahagi rin ni Villafuerte na ang lungsod ang unang nagtatag ng prorama kahit pa walang kaguluhan o kalamidad na nararanasan sa lugar.
“There are a lot of malnourished children identified in the city. We are implementing “Operation Timbang” in the areas we have identified and give treatment to the children and check them on a weekly basis,” aniya.
Sinabi rin ni Villafuerte na limang taon nang filaria-free ang buong lungsod dahil sa patuloy na pagpapatupad ng mga preventive measures ng lokal na pamahalaan.
“We do de-worming for five years in areas we identified just to make sure that there will be no more victims of filariasis,” aniya.
Dagdag pa ni Villafuerte, ang mga sintomas ng filariasis ay kalimitang lumalabas sa walo hanggang sampung taon at dapat na ipatupad ang de-worming sa loob ng limang taon upang mapuksa ang mga pinangingitlugan ng mga lamok.