3 drug personalities, kalaboso

Arestado ang tatlo umanong drug personalities sa magkahiwalay na buy-bust operations sa Valenzuela City, nitong Linggo ng madaling araw.

Kabilang sa mga inaresto sina Razel Dales Santos, 31; Benson Maguigad, 42, kapwa ng Teachers’ Village, Gen. T. De Leon, Valenzuela City; at Johnrie Lan Da, alyas Rosario, 26, ng Sta. Cruz, Maynila.

Si Santos ay nakatala bilang tulak ng ilegal na droga sa drug watchlist.

Unang nagsagawa ng operasyon ang mga tauhan ng Station Drug Enforcement Unit (SDEU) sa Lorex Street, Gen. T. De Leon, dakong 12:15 ng madaling araw.

Sa imbestigasyon, inaresto sina Santos at Maguigad nang makabili ang isang poseurbuyer ng hinihinalang shabu, na nagkakahalaga ng P500, mula sa kanila.

Samantala, ang kanilang kasabwat na kinilalang si “Lupin,” residente sa lugar, ay nakatakas.

Nasamsam sa mga suspek ang apat na pakete ng hinihinalang shabu, P500 buy-bust money, P70 cash, at isang itim na pouch.

Sa ikalawang buy-bust ay isinagawa sa Tamaraw Hills Street, Marulas, dakong 1:30 ng madaling araw.

Sa ulat, binentahan ni Da ng hinihinalang shabu, na nagkakahalaga ng P200, ang poseur-buyer bago siya arestuhin.

Nakuha sa suspek ang apat na pakete ng hinihinalang shabu, P200 marked money, at P200 cash.

Kakasuhan ang mga suspek ng paglabag sa RA 9165 (Comprehensive Dangerous Drugs Act of 2002).

Nagsasagawa ng follow up operation laban kay Lupin.