Ang pangalang Pilipinas ay isang malaking pagkakamali!
ALAM n’yo ba na ang mga pangalang Philippines, Pilipinas, Pilipino at Pilipina ay isang napakalaking pagkakamali? Ang pangalang Philippines ay alam nating lahat na hinango sa pangalan ng dating hari ng Espanya na si King Philippe II.
Daang-daang taon na ang lumipas at walang dating Pangulo ng Pilipinas ang may sapat na paninindigan na itama ang napakalaking pagkakamali na ito. Bakit natin kailangang parangalan ang hari ng Espanya sa pamamagitan ng pagpapangalan ng ating pinakamamahal na bansa sa kanya? Hindi ba si King Philippe II at ang mga haring sumunod sa kanya ang nag-utos at nagpahintulot na apihin, lapastanganin at alipinin ang ating mga ninuno sa sarili nating bayan sa loob ng mahigit na 300 taon?
Kailangang matanto natin na kaya lumalawig ang malaking pagkakamaling ito sa pangalan ng ating bansa ay sa dahilang ang may mga hawak ng kapangyarihan ay pinili na tumahimik na lang. Ilan sa mga puwedeng dahilan nila ay ang takot, hiya, o kawalan ng pakialam.
Bagamat ilang daang taon na ang lumilipas na nanaig ang pagkakamaling ito, ako ay naniniwala na hindi pa huli upang magpahayag ako ng aking paniniwala na kailangang palitan na ang pangalang Pilipinas.
Ako si Ado Poblete na taga-Naic, Cavite. Una kong nasilayan ang liwanag noong Marso 13, 1951. Nag-aral ako sa mababang paaralan ng Naic, sa mataas na paaralan ng Pamantasan ng Santo Tomas, at sa De la Salle College sa Maynila. Dito ako nagtapos ng dalawang kurso, BSBA major in Business Management at BSC major in Accounting.
Pumunta ako sa Amerika noong Agosto 1980. Naging mabuting mamamayan at negosyante ako. Sa katunayan, nabigyan ako ng karangalan ni Mayor Palmer na “Businessman of the Year” sa siyudad ng Trenton sa New Jersey noong 1994. Ito ay iginawad sa akin makalipas ang 10 taon mula nang inumpisahan ko ang aking negosyo noong Setyembre 1984.
Simula nang dumating ako sa Amerika, lagi kong ipinagmamalaki ang Pilipinas at ang ating lahi. Sa aking bahay sa Upstate New York ay arawaraw na may bumabanderang watawat ng Pilipinas at ipinagmamalaki ko sa mga bisita kong Amerikano. Sabi ko “That is the Flag of my most beloved country.”
Bagamat ako ay naninirahan sa Amerika, nananatili pa rin ang aking malaking pagmamahal at malasakit sa ating bansa. Sa dahilang ito, isinusulong ko ang aking mithiing palitan ang pangalan ng Pilipinas.
Ako ay nananawagan sa ating mahal na Pangulong Rodrigo Duterte, sa ating mga senador at mga congressmen na maisulong at maipasa n’yo sa Senado at sa Kongreso ang aking mungkahi.
Ako ay naniniwala na napapanahon na para itama ang napakalaki ng pagkakamali at kasukasukang pangalan ng ating bansa. Dapat nating isipin na hinango ito sa pangalang mapang-api, mapangalipin, at magnanakaw ng dignidad ng ating mahal na mga kababayan, na si Haring Philippe ng Espanya.
Marami nang bansa ang nagpalit ng pangalan: Iran na dating Persia, Cambodia na dating Kampuchea, Myanmar na dating Burma, Jordan na dating Transjordan, Ethiopia na dating Abbysinia, Botswana na dating Bechuanaland, Sri Lanka na dating Ceylon, at maraming iba pa.
Ipinagdarasal ko sa Panginoong Hesukristo at ipinakikiusap ko kay Pangulong Duterte na sa ngalan ng katarungan at katotohanan ay palitan na ngayon ang pangalan ng Pilipinas.
Ano ang ipapalit nating pangalan na angkop sa ating pinakamamahal at kaisa-isang bansa ? Ang aking mungkahi ay MAHARLIKA, sapagkat ito ay nagpapahiwatig ng malayang mamamayan, dakila at makahari.
Ngunit kung mayroong ibang mungkahi ang ating mga kababayan ay puwede naman itong pag-usapan ng Pangulo at ng lehislatura, o kaya ay isangguni sa ating mga mamamayan sa pamamagitan ng referendum. Basta ang mahalaga ay maitama na ngayon ang isang malaking pagkakamali!