DoH: Hinay-hinay sa pagkain
Pinaalalahanan kahapon ang mga Pilipino na magdahan-dahan sa kanilang mga kinakain sa panahon ng mga kasiyahan ng Pasko upang makaiwas sa “holiday illnesses.”
Sinabi ni Department of Health (DoH) Undersecretary Eric Domingo na ang labis na pagkain ng maaalat, matatamis at mamantikang pagkain sa panahon ng mga kasiyahan ay maaaring magdulot ng mga sakit, kaya’t nananawagan siya sa publiko na maging maingat sa kanilang mga kinakain.
“Bawal ang kumain ng masyadong maalat, matamis, at mamantika. As in after Christmas lahat ng blood sugar ay mataas, cholesterol mataas,” paalaala ni Domingo.
Kabilang ang mga atake sa puso, aniya, sa mga kaso na maaaring mangyari sa panahon ng mga pagdiriwang, ngunit ang trangkaso pa rin ang nananatiling pinakakaraniwan sa lahat ng mga sakit, kaya naman pinapayuhan niya ang publiko na maging maingat at magsuot ng mask sa tuwing lumabas ng bahay.
“Common sakit pa rin natin ay flu [ngayong Pasko]. Kung hindi nagpabakuna for the flu, stay away from people who have it,” ani Domingo.
“At kung may sakit ka, huwag ka ng manghawa ng iba. Mag-mask ka, especially for the elderly or yung mga immuno-compromise or kung may sakit ka talaga, [tulad ng diabetes, cancer]. If going out in public, wear a mask,” dugtong ni Domingo.
Binanggit din niya ang pagtaas ng mga aksidente sa sasakyan dahil sa pagmamaneho nang lasing, kaya pinaalalahanan niya ang publiko na “drink on moderation” sa mga kasiyahan.