Tumindig sa sariling anino

PALIBHASA’Y maluwag pa ang Commission on Elections (Comelec) sa implementasyon ng maagang pangangampanya o premature campaigning, nasasaksihan at naririnig pa

natin ang iba’t ibang estratehiya ng mga kandidato sa paghikayat ng mga botante; mga estratehiya na hindi epektibong batayan ng pagpili ng mga namumuno sa atin, lalo na ng mga naghahangad maging Senador.

Kapuna-puna na ang ilang kandidato ay umaasa o nananangan lamang sa pag-endorso ng mga sikat na pulitiko at prominenteng mamamayan. Ibig sabihin, hindi sapat ang kanilang mga kakayahan at kuwalipikasyon sa paghawak ng makabuluhang tungkulin sa bayan; dahilan upang sila ay humanap ng masasandalan.

Natitiyak ko na hindi ito ang tunay

na batayan o barometro ng matitino at maaasahan nating mga lider; hindi ito ang hinahangad ng katulad kong mga botante. Kailangan natin ang mga senador -- at maging ng iba pang mga kandidato sa iba’t ibang puwesto -- na may sariling paninindigan sa pagbalangkas ng mga batas at patakaran para sa kaunlarang pangkabuhayan at panlipunan, lalo na ang hinggil sa pagmamalasakit sa ating mga kababayang nasa laylayan, wika nga, ng lipunan.

Kailangan natin ang mga mambabatas na makikipagbalitaktakan sa plenaryo sa pamamagitan ng mga argumento na may lohika; mga

pangangatuwirang produkto ng matitinong pag-iisip. Hindi na kailangang ang mga lider ng nagtapos sa kinikilalang mga institusyon, tulad ng mga unibersidad at pamantasan sa daigdig; sapat nang sila ay nasasandatahan ng paninindigang hindi matatangay ng kumpas ng sinuman.

Hindi na natin dapat hanapin ang sinaunang mga senador at iba pang mambabatas na tunay namang tumindig sa plenaryo sa pamamagitan ng sariling tapang, talino, at talas ng pananalita. Mawalang-galang na sa mga kinauukulan, nais kong maniwala na ang pagtuklas sa gayong huwarang

mga lider ay tulad ng paghahanap ng karayom sa bunton ng mga dayami. Hindi ba nasaksihan na natin ang ilang mambabatas na sinasabing nagbubutas lamang ng silya at nagbibilang ng butiki sa kisame?

Kailangan natin ang mga lider na titindig sa sariling anino -- gilas, talino at matinding paninindigan sa makatuturang mga isyu; yaong hindi manganganino sa pagtutuwid ng mga pagkakamali na yumuyurak sa karapatan at katarungan ng sambayanan. Asahan natin ang mga mamumuno na may gayong mga simulain sa ating paglahok sa napipintong halalan.