Petisyon vs ‘illegal’ BOL inihain sa SC
Hiniling ng Philippine Constitutional Association (Philconsa) sa Supreme Court na ideklarang ilegal at labag sa Konstitusyon ang Republic Act 11054 o Bangsamoro Organic Law (BOL).
Sa 37-pahinang petisyon, ipinapatigil din ng Philconsa sa SC ang implementasyon ng R.A. 11054 o BOL at ipinapawalang-bisa ang nasabing batas.
Para sa Philconsa, nakagawa ng grave abuse of discretion ang dalawang kapulungan ng Kongreso sa pagpasa sa BOL.
Sa ilalim ng naturang batas, bubuwagin ang Autonomous Region in Muslim Mindanao (ARMM) para bubuuin ang Bangsamoro Autonomous Regions (BAR) bunga ng 2014 peace deal sa Moro Islamic Liberation Front (MILF).
Ayon sa petitioner, partikular na nilabag ng BOL ang Section 18 at 19 ng Article 10 ng 1987 Constitution na isang Organic Act lamang ang dapat isabatas para itatag ang autonomous region sa Muslim Mindanao.
Ito ay nakapaloob sa Republic Act 6734 na ipinasa noong 1989 at inamyendahan ng R.A, 9054 noong 2001.
Nalabag din anila ang doktrina ng separation of powers sa Saligang Batas sa pagtatag ng parliamentary form ng pamahalaan sa BAR.
Giit ng Philconsa, tanging ang ARMM at ang Cordilleras ang nilikha ng Konstitusyon kaya ito lamang ang autonomous regions na kinikilala ng Saligang Batas.
“Only an amendment to the Constitution will allow the creation of a new autonomous region,” diin ng
Philconsa.
Dalawang plebisito ang nakatakda para sa ratipikasyon ng BOL, sa Enero 21, 2019, at sa Pebrero 6, 2019.
Kabilang sa respondents sa kaso sina Executive Secretary Salvador Medialdea, mga miyembro ng Senado at Kamara na pinamumunuan nina Senate President Vicente Sotto at House Speaker Gloria Macapagal-Arroyo.
Kaugnay nito, sinabi kahapon ng Malacañang na bahala na ang SC na magdesisyon sa constitutionality ng BOL.
“We will let the Supreme Court decide on that matter. As we said, we will always defer to the other branch of the government,” pahayag ni Presidential Legal Counsel at Spokesperson Salvador Panelo sa press briefing sa Palasyo.