Olympic dream, sisimulan ni Didal sa US

TUTUNGO sa America si 2018 Asian Games gold medalist Margielyn Didal upang simulan ang kanyang pagsasanay at paghahanda sa inaasam na Olympic qualifying.

Kasunod nito ay ang kanyang pagsabak sa 2019 Street League Skateboarding PRO elite competitions na gaganapin sa Rio de Janeiro sa Brazil sa unang linggo ng Enero.

Bunsod ng kanyang pagpasok sa Top 8 sa nakaraang SLS sa London noong Marso ng kasalukuyang taon, awtomatikong nakapasok sa semis ang Cebu pride na si Didal.

“She earned it from her SLS competition sa London. Actually nasurprised din kami but they automatically gave her sa semis slot dshil nga sa naging performance niya. And I am very happy for her,” pahayag ni Monty Mendigoria, ang presidente ng Skateboarding and Roller Sports Association of the Philippines, (SRSAP).

Ang nasabing kompetisyon na lalahokan ni Didal sa Brazil ay simula lamang ng mga ilang international stints na kanyang paghahandaan upang makakuha ng magandang ranking para makakuha ng tiket sa 2020 Olympics sa Japan.

Target ni Didal na makapuwesto sa top 38 sa world ranking upang makasiguro ng slot sa Olympics.

Kumpiyansa naman si Mendigoria na makakapasok si Didal sa top 38 upang makakakuha ng puwesto sa Olympics.

“I’m very confident na kaya niya na makapasok kahit sa top 10, with her performance I know shw can make it to the top 10,” ayon kay Mendigoria.

Samantala, kamakailan lamang nang mapasama sa top 25 Most Influential Teens in the World ng Times Magazine si Didal bunsod ng sunud-sunod na tagumpay na kanyang iniuwi para sa Pilipinas.