U.S. ‘di bibitaw sa Mutual Defense Treaty
Muling ipinahayag kahapon ng gobyerno ng United States ang matatag na alyansa nito sa Pilipinas, kabilang ang mga pangako sa ilalim ng Mutual Defense Treaty (MDT) ng 1951.
Ipinaabot ni State Secretary Michael Pompeo ang kanyang pangako nang makapulong niya ang nagbibisitang si Foreign Affairs Secretary Teodoro Locsin Jr. sa Washington, D.C., sinabi ni U.S. State Department Deputy Spokesperson Robert Palladino sa media readout.
“Secretary Michael R. Pompeo met with Philippine Secretary of Foreign Affairs Teodoro Locsin, Jr., at the Department of State today. The Secretary reaffirmed the enduring U.S.-Philippines alliance, including commitments under the Mutual Defense Treaty of 1951,” ani Palladino.
Binibigyang–diin ng MDT, kabilang ang iba pa, ang mutual commitment sa mapayapang pagresolba sa international disputes, magkahiwalay o magkasamang pagsusulong sa kakayahang labanan ang pag-atake, at konsultasyon sa territorial integrity, political independence, o seguridad ng United States o ng Pilipinas kapag nasa panganib ng pag-atake sa Pacific.
Nauna rito, ipinahayag ni U.S. Defense Deputy Assistant Secretary for South and Southeast Asia Dr. Joseph Felter ang kanilang pangako sa inilarawan niyang “ironclad” na alyansa ng Amerika at Pilipinas sa ilalim ng foundational document ng MDT.
Idiniin ni Felter na nakapangako ang U.S. sa Pilipinas “in ensuring that its sovereignty isn’t threatened.”