2 drug pusher hinatulan ng habambuhay
Hinatulan ng habambuhay na pagkakakulong ang dalawang lalaki dahil sa pagbebenta ng isang kilo ng shabu sa Malate, Maynila noong 2016.
Sa desisyon ng korte na inilabas nitong December 13, 2018, hinatulan ni Judge Emilio Rodolfo Legaspi III, ng Manila Regional Trial Court Branch 13, sina Asnawe Macabato at Abdul Montaquim Goco nang mapatunayang guilty sa paglabag sa Section 5 ng Comprehensive Dangerous Drugs Act of 2002.
Bukod dito, pinagmumulta rin sila ng tig-P500,000.
Enero 19, 2016, nakatanggap ng impormasyon si PO2 Joseph Halago, MPD District Anti-Illegal Drugs-Special Operations Task Group (DAID-STOG), na sina Macabato at Goco ay sangkot sa illegal drug trade at gumagamit ng Toyota Altis sa transaksiyon.
Sinabi rin ng informant kay Halago na personal niyang nakatransaksiyon ang dalawa.
Matapos nito, isinagawa ng Manila police at ng Philippine Drug Enforcement Agency (PDEA) ang buy-bust operation sa Guererro Street malapit sa San Andres St., sa Malate, Maynila noong Enero 21, 2016.
Dinakma sila matapos na makipagtransaksiyon sa isang undercover cop at informant. Isang pakete ng shabu at buy-bust money na P2,000 ang nakuha sa mga suspek, ayon sa awtoridad.
“The allegations of Asnawe Macabato and Abdul Montaquim Goco are unbelievable on the planting of shabu, considering that from their very own testimonies, the planting was made in the Puregold (Store) area where mediamen were already present when they arrived,” saad sa desisyon .