Paul McCartney, Emma Stone magsasama sa anti-bullying music video
LONDON (Reuters) – Nakipag-team up ang dating gitarista at mang-aawit ng The Beatles na si Paul McCartney sa Oscar winner na si Emma Stone sa isang music video para sa kanyang bagong single na Who Cares, isang awitin na hangad niyang magbigay-inspirasyon sa kabataan na manindigan laban sa bullying.
Makikita ang pares na nagsasayaw sa isang black and white set kasama ng mga harlequin-like figures na nagpapahirap kay Emma bago sila tumakas gamit ang sasakyan ni Paul.
Nakipagtulungan din ang beteranong singersongwriter sa non-profit organization na Creative Visions para sa paglulunsad ng #WhoCaresIDo campaign, na inspired mula sa lyrics ng kanta na—“Who Cares About You, I do”.
“My hope is that if there are kids being bullied — and there are … maybe by listening to this song and watching this video, they might just think it’s not as bad,” pahayag ni Paul sa kanyang website.
“That it’s the kind of thing you can just stand up to and laugh off and get through.”
Una nang naka-collab ni Paul ang iba pang mga artists tulad nina Kanye West at Rihanna. Habang nitong nagdaang Linggo, nakasama ng singer sa entablado ang kanyang kapwa dating Beatle na si Ringo Starr at ang Rolling Stones guitarist na si Ronnie Wood sa kanyang pagtatanghal sa London.
Kabilang ang Who Cares sa 17th solo studio album ni Paul na Egypt Station.