Ginang, nanganak sa kalsada
Inayudahan ng tatlong nagpapatrulyang babaeng pulis-Makati ang isang buntis na napaanak mismo sa kalsada nitong hapon ng Disyembre 25.
Isinugod sa Ospital ng Makati ang ginang, 22, at kanyang sanggol na lalaki.
Kinilala ang mga tumulong na pulis na sina PO1 Evangeline Evardo, PO1 Fatima Manalo at PO1 Marygrace Lanaja, pawang Tourist Police patrollers sa P. Burgos, Makati City.
Sa ulat ng Southern Police District (SPD), nagpapatrulya ang tatlong pulis nang maispatan ang ginang na namimilipit sa sakit ng tiyan at hindi inaasahang napaanak sa kalsada sa kahabaan ng P. Burgos, bandang 3:30 ng hapon.
Sa unang pagkakataon, isinagawa nina PO1s Evardo, Manalo at Lanaja ang kanilang natutunan sa first aid training matapos ipabatid ang insidente sa Tactical Operations Center ng Makati City Police, na humingi ng ayuda sa Makati Rescue para sa emergency ambulance.
Habang hinihintay ang ambulansiya, maingat na hinawakan ni PO1 Evardo ang mga kamay ng lalaking sanggol at hawak naman ni PO1 Lanaja ang umbilical cord at si PO1 Manalo ang umasikaso sa ginang.
Dumating ang Makati Rescue Team at dinala sa ospital ang magina na kapwa nasa maayos nang kalagayan.
Samantala, pinuri naman ni Senior Supt. Roeglio Simon, hepe ng Makati City Police, sina PO1 Evardo, PO1 Manalo at PO1 Lanaja.
“The whole PNP takes pride on their selflessness and dedication to duty. Their acts are indeed one of the many PNP’s Good Deeds that need to be shared and emulated by all personnel,” ayon kay Senior Supt. Simon.
“Congratulations and keep it up. You are truly a Makati’s Pride!” pagtatapos ni Senior Supt. Simon.