Maging simple, huwag gahaman
SA kanyang homily sa misa noong bisperas ng Pasko, hinikayat ni Pope Francis ang mga Kristiyano na maging payak at simple, itapon ang pagka-gahaman, kasibaan at materyalismo ng Pasko. Sa misa na ginanap sa St. Peter’s Basilica sa Vatican, umapela siya sa mga tao na pagtuunan nang higit ang mensahe ng Pasko o pagsilang ni Hesus: kapayakan (simplicity), kawanggawa, at pag-ibig.
Sa larawan na inilabas ng isang English broadsheet kahapon, makikita si Pope Francis na hinahalikan ang mga paa ng estatwa ni Baby Jesus, tanda ng pagmamahal at kapakumbabaan.
Sa kanyang ika-6 na “Urbi et Orbi” (To the City and to the World) address naman noong Martes (Pasko), inihayag ng Santo Papa ang kanyang Christmas wish ng pagkakapatiran ng mga mamamayan ng mundo na may iba’t ibang paniniwala, lahi o ideya. Hinikayat ang sangkatauhan na itapon ang “partisan interests” upang magkaroon ng solusyong pulitikal ang mga digmaan sa Syria at Yemen at gusot sa Ukraine at Korean peninsula. Sana sa Pilipinas din.
Sa isa pang larawan ng broadsheet, ipinakita ang FB post ni ex-Davao City Mayor Paolo Duterte na kapiling ni Pangulong Rodrigo Roa Duterte ang kanyang pamilya sa tradisyunal na Noche Buena. Kasama ng ating Pangulo ang una niyang asawa, si Elizabeth Zimmerman at mga anak na sina Paolo, Davao City Mayor Sara Duterte-Carpio at Sebastian.
Kasama rin sa FB photo ang ginoo ni Mayor Sara, si Atty. Manases Carpio, ang ginang ni Paolo na si January, ang ginang ni Sebastian na si Kate Necesario, at ang mga apo ni PRRD at Elizabeth. Nakatutuwa ang mensahe ni Mano Digong nitong Pasko: Matuto sa aral ng kapanganakan ni Kristo. Si Kristo, bagamat tunay na hari, ay piniling isilang sa hamak na sabsaban matapos tanggihan na patuluyin ng mga tao na nilapitan.
May nagtatanong: ‘Di ba hindi naniniwala si PDu30 sa Diyos ng mga Kristiyanong katoliko? Eh, bakit hinihikayat niya ang mga Pilipino na matuto sa diwa at mensahe ng pagsilang ni Jesus? Marahil, sa ubod ng puso at isip ng ating Presidente, naniniwala siya sa Diyos ng Simbahang Katoliko na ang aral ay pagmamahalan, pagkakasundo at pagkakaisa dangan nga lamang at nagkaroon siya ng malungkot at mapait na karanasan sa kamay ng ilang paringKatoliko noong kanyang kabataan.
Sa panig ni Pope Francis, inihayag niya na maraming tao ngayon ang higit na nagpapahalaga sa material possessions. Ganito ang pahayag ni Lolo Kiko: “An insatiable greed marks all human history, even today, when paraxodically a few dine luxuriantly while all too many go without the daily bread to survive.” ‘Di ba sa dasal na Ama Namin, nanghihingi ng pagkain araw-araw ang mga mananampalataya?
Kinondena rin ng Santo Papa, unang Latin American pope, ang global financial system na nagreresulta sa “rich richer at the expense of the poor.” Kabilang ba ang mahal kong Pilipinas sa pinatutungkulan dito ni Lolo Kiko, na maliit na porsiyento lang ng lipunang-Pilipino ang ubod ng yaman, kumakain nang masarap sa mga sikat na restaurant at hotel, samantalang milyun-milyong Pinoy ang salat sa pagkain, walang pera at marami ang hindi nakakakain ng tatlong beses sa maghapon?