Seguridad sa NAIA tiniyak

Tiniyak ng Malacañang na ginagawa ng gobyerno ang lahat ng makakaya nito para mapabuti ang seguridad sa Ninoy Aquino International Airport (NAIA), idiniin na ang kaligtasan ng mga pasahero ang pangunahing prayoridad ng administrasyon.

Nagpahayag si Presidential Spokesperson Salvador Panelo matapos payuhan ng United States Department of Homeland Security (DHS) ang mga pasahero tungkol sa hindi sapat na security measures sa NAIA.

Sa kanyang pahayag, sinabi ni Panelo na pinag-aaralan na nila ang advisory, kabilang ang kanilang mga rekomendasyon sa pagpapabuti sa airport security.

“We are looking into the United States Department of Homeland Security’s travel advisory, including their recommendations on how the government may tighten its current security measures, particularly as regards the safety of our airports,” aniya kahapon.

Ayon kay Panelo, ang marinig ang inputs ng global partners ay isang paraan upang matiyak na ang mga taong pumapasok at lumalabas sa bansa ay ligtas, lalo na mga banta ng terorismo.

“We intend to utilize the inputs of our global partners, including international assessment bodies such as the International Civil Aviation Organization (ICAO) whose latest security audit findings were found to be ‘generally satisfactory’ with ICAO standards of safety and security,” aniya.

“We assure everyone that the Philippine government, through the Department of Transportation (DOTr), the Manila International Airport Authority (MIAA) and the Office for Transportation Security (OTS), is prioritizing the implementation of strict security measures at the Ninoy Aquino International Airport,” aniya pa.

WALANG BANTA Samantala, sinabi ni Defense Secretary Delfin Lorenzana na ang NAIA ay hindi vulnerable sa terror attacks dahil sa maraming bagay na nakapalibot dito. Gayunman, sinabi niya na hindi ito ang aspetong tinutukoy ng DHS.

“Hindi naman siguro tayo vulnerable sa... Although, hindi naman natin masasabi na hindi tayo vulnerable sa terrorists. Siguro hindi naman ‘yun ang kanilang tinutukoy,” aniya sa press briefing sa Malacañang kahapon.

Sinabi ri ni Lorenzana na walang banta ng anumang posibleng pag-atake sa NAIA sa kabila ng mga kumakalat na text message na maaaring may ilulunsad na mga pag-atake sa Quiapo at Baclaran.

“But we take those advisories, kahit na mga rumors lang ‘yan we do not discount them. We verify,” dagdag niya.