Defense treaty sa US, kailangan pa ba?
Rerepasuhin ng Department of Defense (DND) ang Mutual Defense Treaty (MDT) sa pagitan ng Pilipinas at United States, kung kailangan pa ba ito sa kasalukuyang panahon.
Sa press briefing sa Malacañang, sinabi ni Defense Secretary Delfin Lorenzana na panahon na para muling pag-aralan ang MDT at ang mga probisyon nito na nabuo noong 1951.
“That was done in 1951. And when that was done in 1951 there was this raging Cold War. Do we still have a Cold War today? Is it still relevant to our security. Baka hindi na,” aniya kahapon.
“Hindi naman sinasabing strengthen natin para tulungan tayo pag may gulo. Sino ba’ng kalaban natin? Are we still hoping somebody will attack us here in the Philippines? I don’t think so,” aniya pa.
Ayon kay Lorenzana, inatasan niya ang kanilang mga abogado na simulang pag-aralan ang kasunduan, upang matukoy kung dapat pa bang panatilihin ang MDT, patatagin o ibasura na.
Sinabi ni Lorenzana na isa sa factors na kanyang tinitingnan kung paano nakatutulong ang MDT sa Pilipinas sa nagbabagong security structure sa Southeast Asia.
Isa rin sa mga ikinokonsidera nila na kailangang rebyuhin ang MDT ay ang posibleng pagkaipit sa gitna ng Pilipinas kapag napasubo sa giyera ang United States sa ibang mga bansa gaya ng China na ngayon ay nagkakaroon ng tensyon.
“Attack on one is attack on other. So ma-involve tayo diyan,” aniya.
Makailang ulit nang sinasabi ni Pangulong Rodrigo Duterte na walang kakayahan ang Pilipinas na makipaggiyera.
Gayunman, aminado si Lorenzana na malaki ang naging pakinabang ng Pilipinas sa United States dahil sa MDT at side agreements nito.
“Nakatulong naman ‘yung US sa atin. Nakakabigay naman sila ng yearly grant sa ating military --training, and some things,” aniya.
“But overall, tignan natin. The bottom line is, is it to our interest to have this continue. ‘Yung mga provisions ba ‘yan is still relevant today?” dugtong niya.