Paninindigang hulog ng langit

ANG pagpapawalang-saysay o dismissal ng Supreme Court (SC) sa petisyon laban sa Anti-Hospital Deposit Law (AHDL) ay natitiyak kong isang hulog ng langit sa sambayanan, lalo sa mga masasakitin na malimit isugod sa mga ospital. Nangangahulugan na ang naturang batas ay hindi labag sa Konstitusyon at marapat pairalin para sa kapakanan ng mga pasyente na nangangailangan ng makatao at makatarungang serbisyong pangkalusugan.

Magugunita na ang Private Hospitals Association of the Philippines, Inc. (PHAPI) ay nagsampa ng petisyon laban sa AHDL sa matuwid na ito ay labag sa Konstitusyon. Tinututulan ng nasabing grupo na hindi makatarungan ang dagdag na parusa sa may-ari ng mga ospital, klinika at sa kanilang mga doktor at kawani na hihingi o tatanggap ng deposito para sa pagpapaospital at pagpapagamot ng mga pasyente.

Ang naturang petisyon ay dinismis ng SC, kaakibat ng pagbibigay-diin na walang balakid sa implementasyon ng AHDL na nagpapataw ng parusang pagkabilanggo at multa sa mga lalabag. Bukod sa pagbabawal sa paghingi at pagtanggap ng deposito sa mga magpapaospital, pinalawak din ng nasabing batas ang mga serbisyong pangmedikal, kabilang na ang libreng paglilipat ng mga pasyente sa ibang ospital sa pamamagitan ng mga ambulansya ng mga pamahalaang lokal.

Maaaring nakabibigat sa PHAPI ang mga probisyon ng nabanggit na batas, lalo na kung iisipin na masyado rin namang magastos ang pamamahala ng mga pribadong pagamutan. Kailangan nilang panatilihin ang mataas na kalidad ng medical service sa pamamagitan ng makabagong medical facilities at mahuhusay na mga medical personnel.

Ang gayong mga pagsisikap ay marapat lamang isaalang-alang ng pamahalaan sa pamamagitan ng pagtupad ng makatarungang mga obligasyon nito kaugnay ng pagkakaloob ng mga serbisyong pangkalusugan. Hindi ko matiyak, halimbawa, kung hanggang saan na nakarating ang masasalimuot na isyu hinggil sa sinasabing pagkabigo ng gobyerno sa pagbabayad ng utang sa PhilHealth sa mga pribadong ospital. Bilyun-bilyong piso umano ang obligasyon ng naturang ahensiya ng pamahalaan na marapat nang tutukan para sa makatuturang operasyon ng mga pagamutan.

Sa anu’t anuman, hindi dapat ipagwalang-bahala ang mabuting relasyon ng gobyerno at ng pribadong mga ospital – serbisyong pangmedikal na laging nakaangkla sa pagtupad sa AHDL. Sa gayon, ang anumang benepisyo na idudulot ng makabuluhang pagdadamayan ay mananatiling hulog ng langit sa sambayanan, lalo na sa katulad naming masasakitin.