Basura balikKorea sa Enero 9

Ibibiyahe na ang 6,500 toneladang basura na stranded ngayon sa Misamis Oriental pabalik sa pinagmulan nito sa Pyeongtaek City, South Korea sa target nitong petsa na Enero 9.

Sinabi ng mga kinatawan ng Bureau of Customs (BoC) at ng environmental group EcoWaste Coalition na nagkasundo na ang mga gobyerno ng Pilipinas at South Korea sa pagpapabalik ng 51 containers ng basurang ilegal na dinala sa bansa.

Sinabi ni John Simon, Port Collector sa Mindanao International Container Terminal (MICT) na inaasahan nila na ibibiyahe pabalik ang 51 containers na puno ng basura na nakaimbak sa MICT sa Enero 9 basta nakumpleto ang lahat ng regulatory requirements.

“Their expedited re-export is what BOC wants and this is what our people are yearning for,” ani Simon.

Sinabi ni Aileen Lucero, national coordinator ng EcoWaste Coalition na inaabangan ng grupo ang “imminent return of the Korean mixed garbage shipments to their source’’.

Mariin din niyang isinulong ang pagpapatibay ng mahihigpit na polisiya para maiwasang maulit ang insidente, gayundin ang pagtugis sa importasyon ng plastic wastes.

Kaugnay naman sa bulto ng Korean garbage shipments na nakaimbak sa Verde Soko compound sa loob ng Phividec Industrial Estate sa Barangay Sta. Cruz sa Tagoloan, ipinahayag ni Simon na inaayos na ang arrangements para maipabalik ang mga ito sa ngayong buwan din.

Magugunit na isang barko ng 5,176.91 metriko tonelada ng misdeclared “plastic synthetic flakes” na inangkat ng Green Soko Co. Ltd. at naka-consign sa Verde Soko Philippines Industrial Corp. ang dumating sa MICT noong Hulyo 2018 nang walang import clearance mula sa Department of Environment and Natural Resources.

Ang parehong consignee rin ang umayos sa importasyon ng karagdagang 51 containers ng “plastic synthetic flakes,” na dumating sa MICT noong Oktubre 2018.

Natuklasan sa inspeksiyon ng mga opisyal ng Bureau of Customs at DENR ang imported “plastic synthetic flakes” ay “mis-declared, heterogenous and injurious to public health,” na ikinagalit kapwa ng Pilipinas at South Korea, kabilang ang protest actions ng EcoWaste Coalition sa labas ng embassy ng SoKor sa Taguig City noong Nobyembre 15 at Disyembre 13, 2018.

Nagpasa naman ang Tagoloan Municipal Council ng resolusyon na mariing kinokondena ang “importation of plastic mixed with hazardous waste materials from South Korea”.