Ligtas bumiyahe sa Mindanao—Palasyo
Ligtas pa ring bumisita sa Mindanao. Ito ang tiniyak ng Malacañang sa publiko kasunod ng travel alerts kamakailan na inilabas ng United Kingdom at Australia.
Sinabi ni Presidential Spokesman Salvador Panelo na nauunawaan ng Palasyo ang intensiyon ng mga dayuhang gobyerno na pangalagaan ang kanilang mga mamamayan ngunit tiniyak niya ang pambobomba sa Cotabato City ay isang isolated incident.
“It’s natural for any foreign government, or any government for that matter, to be concerned about the welfare, the safety of their citizens and we cannot blame them if they have such views following the bombing in Cotabato but that’s an isolated case,” aniya sa news conference sa Palasyo.
“Insofar as the National Defense Secretary is concerned, it is very safe to travel in Mindanao,” aniya.
Kamakailan ay pinayuhan ng Australia ang kanyang mamamayan laban sa pagbiyahe sa katimugan ng Mindanao dahil sa mga banta ng terorismo at kidnapping.
Naglabas din ang United Kingdom ng parehong travel warning laban sa Mindanao, binanggit ang posibilidad ng pag-atake ng mga terorista sa Pilipinas.
Inilabas ng dalawang bansa ang travel warnings kasunod ng pagpasabog sa isang mall sa Cotabato City nitong Disyembree 31 na ikinamatay ng dalawang katao at ikinasugat ng ilan dosenang iba pa.
Nauna rito ay naglabas ang United States at Canada ng travel advisory sa kanilang mga mamamayan na iwasang magpunta sa Mindanao.
Samantala, posibleng makaapekto sa pagsusulong sa usapan pangkapayapaan sa Mindanao ang insidente ng pagpapasabog sa isang mall sa Cotabato City.
Ayon kay Presidential Adivser on the Peace Process Carlito Galvez, may ilang grupo na patuloy pa ring kumokontra sa Bangsamoro Organic Law (BOL).
Sa ngayon, aniya, ay mahalaga na maging mahinahon ang mga tagaCotabato habang gumugulong ang imbestigasyon.