Litrato ng 2 Cotabato blast suspects, inilabas

Isinapubliko na kahapon ng Philippine National Police (PNP) ang litrato ng dalawang suspek sa pambobomba sa isang shopping mall sa Cotabato City nitong bisperas ng Bagong Taon, na ikinasawi ng dalawang katao at ikinasugat ng 34 na iba pa.

Sinabi ni Police Regional Office (PRO)12 director Supt. Aldrin Gonzales na ang larawan ng dalawang suspek ay nagmula sa closed-circuit television (CCTV) footages na kinuha nila sa pamunuan ng binombang South Seas Mall.

Wala pang inilalabas ang mga awtoridad na official description ng dalawang suspek.

Gayunman, kung ang litrato ang pagbabatayan, makikita na ang pangunahing suspek ay nasa late 20s o early 30s, na may bitbit na back pack.

“Siya ‘yung nag-iwan ng IED (improvised explosive device) sa loob ng mall at ‘yung nakita na naghulog ng isa pa sa labas,” sabi ni Gonzales.

Ang pangalawa namang suspek ay matanda nang kaunti sa primary suspect, na nagsisilbi namang lookout.

Aminado naman ang opisyal na hindi pa rin nila natutukoy ang pagkakakilanlan ng dalawa, kasabay na rin ng panawagan sa publiko na makipagtulungan sa kanila para sa ikaaaresto ng mga ito.

“Pinag-aralan ng investigators natin ‘yung CCTV na nakuha ng SITG South Seas at sila talaga ‘yung nakita sa mga footage,” aniya.

Sinabi ni Gonzales na layunin ng kanilang grupo na kilalanin muna ang mga suspek at matukoy ang grupong kinaaniban ng mga ito upang madakip at masampahan ng kaukulang kaso.

Nauna nang inihayag ni PNP Chief Director General Oscar Albayalde na sinisiyasat na nila kung may kinalaman sa insidente ang mga Islamic State (ISIS)-inspired terror group na kumikilos sa Mindanao.