Pag-asa ng kapayapaan ang hiling ng mundo ngayong 2019

NASAKSIHAN ng mundo ang isang mapayapang pagpapalit ng taong 2019 nitong Martes, kasama ng mga fireworks na nagsabog ng liwanag sa madilim na kalangitan sa maraming s’yudad sa pagwawakas ng hatinggabi ng lumang taon. Ang Line Islands sa timog ng Hawaii, kasama ng silangang dulo ng Siberia ng Russia, ang unang sumalubong sa 2019, na nasa kanluran lamang ng International Date Line.

Sa pag-inog ng mundo, nagsimula na ang sunud-sunod na pagsalubong ng bagong taon sa New Zealand at Australia, sa Japan at Korea, sa Pilipinas at Indonesia, sa Mongolia, China, at sa Timogsilangang Asya. Kasunod ng pagdiriwang ng India at ng Gitnang Silangan, na sinundan ng Europa at Africa, at ang huli ang Timog at Gitnang Amerika, Canada, at Estados Unidos.

Sumabog sa kalangitan ang pinakamaingay at makulay na fireworks sa Australia, France, United Kingdom, at sa US, na ang mga lungsod ay may kanya-kanyang tradisyon ng pagtitipon ng maraming tao sa mga sikat na lugar at istruktura sa pagsisimula ng taon. Nariyan ang mga banta ng terorismo ngunit naging mapayapa ang kabuuang pagdiriwang ng buong mundo.

Halos isang linggo na ang nakalipas simula nang mag-umpisa ang bagong taon at nadarama ngayon ang kapayapaan. Sa kanyang mensahe para sa bagong taon, sinabi ni United Nations Secretary General Antonio Guterres na patuloy na humaharap ang mundo sa maraming pagsubok, katulad ng lumalalang climate change, malaking bilang ng mga migrante na naghahanap ng kaligtasan at proteksiyon, patuloy na kawalan ng pagkakapantay-pantay sa loob at pagitan ng mga bansa. “But there are also reasons for hope,” aniya, kasabay ng pagbanggit sa usapang pangkapayapaan sa Yemen at Timog Sudan, ang bagong pandaigdigang kasunduan ng climate change sa Katowice, Poland, at ang iba pang desisyon sa migration at mga naglalakbay.

Isang pandaigdigang leader, si Pope Francis, ang umapela para sa pagkakaisa sa loob ng Simbahan na gumugunita sa Enero 1 bilang Pandaigdigang Araw ng Kapayapaan. Ngunit nanawagan din siya sa mundo, hindi lamang sa mga leader sa pulitika, na gawin ang kanilang bahagi para sa pagsusulong ng kapayapaan. “And that begins at home in the family,” aniya.

Maging ang ating Pangulong Duterte ay nagpaabot din ng mensahe ng pag-asa para sa mga Pilipino. Sinabi niya na patuloy nahaharap ang bansa sa “ills of drugs, criminality, and corruption.” Ngunit, iginiit niyang, “I have no doubt that with our patriotic fervor and our solidarity as a people, we can overcome the challenges that impede our march towards a more prosperous and progressive future.”

Tunay namang nagkaroon tayo ng mapayapang simula para sa bagong taon sa buong mundo, na nagpataas ng pag-asa sa maraming bansa, kabilang ang ating bansa. Kasama tayo sa pandaigdigang paghahangad para sa kapayapaan lalo’t marami tayong kailangang mapagtagumpayan ngayong 2019.