Globes trophy, inialay ni Darren Criss sa Pinay na ina
INIALAY ng aktor na si Darren Criss ang kanyang unang Golden Globe award sa kanyang Pinay na ina.
Kinilala si Darren bilang Best Actor para sa limited series or movie made for television, para sa kanyang pagganap sa The Assassination of Gianni Versace: American Crime Story, na wagi rin para sa best limited series or movie made for television sa 76th Golden Globes nitong Linggo sa Beverly Hills, California.
“As we’ve seen, it’s been a marvelous year for representation in Hollywood and I am so enormously proud to be a teeny tiny part of that as the son of a firecracker Filipino woman from Cebu who dreamed of coming to this country and getting to be invited to cool parties like this,” sabi ni Darren sa kanyang acceptance speech.
Pinasalamatan din ng dating Glee star ang kanyang ina na siyang “hugely responsible” para sa “most of the good things” na nangyari sa buhay niya.
“I love you dearly, I dedicate this to you,” aniya pa.
Ginampanan ng 31 taong gulang na aktor ang karakter ng Filipino-American na si Andrew Phillip Cunanan, ang lalaking akusado sa pagkamatay ng Italian fashion designer na si Gianni Versace, sa The Assassination of Gianni Versace: American Crime Story.
Noong nakaraang taon, kinilala rin si Darren sa 70th Primetime Emmy Awards para sa nasabing pagganap, at ginawaran siya ng “Outstanding Lead Actor in a Limited Series or Movie” award.