DepEd officials, teachers, bawal mamulitika
Binalaan kahapon ng Department of Education (DepEd) ang mga opisyal nito, mga guro, at mga non-teaching personnel, laban sa electioneering at partisan political activities kaugnay ng eleksiyon sa Mayo 13, 2019.
Ayon kay Education Secretary Leonor Briones, dapat na manatiling patas at walang kinikilingan ang mga tauhan ng kagawaran sa buong election period sa bansa.
Mahigpit ang naturang habilin ni Briones sa kanyang mga tauhan, kasunod ng pagpapalabas niya ng DepEd Order No. 48, series of 2018, na salig sa ipinalabas na panuntunan ng Civil Service Commission (CSC) at Commission on Elections (Comelec).
Nakapaloob sa naturang kautusan ni Briones ang mga ipinagbabawal na aktibidad kaugnay ng nalalapit na halalan.
Nabatid na kabilang sa mga hindi papayagan ang pagtatatag ng mga grupo, organisasyon, komite at iba pa na naglalayong humingi ng boto at mangampanya pabor o laban sa sinumang kandidato.
Bawal din ang maghayag, magkomento, magtanong, at maglabas ng campaign materials para sa mga kandidato.
Hindi rin pinapayagan ang pagtanggap ng anumang kontribusyon mula o para sa isang pulitiko, gayundin ang pagsusuot ng T-shirt, sombrero, at iba pang ginagamit sa kampanya ng isang kandidato o political party, maliban na lang kung awtorisado ito ng Comelec.
Mahigpit ding ipinagbabawal ang maging watcher para sa isang kandidato o political party, at hindi rin
pinapahintulutan ang paggamit ng mga ari-arian ng pamahalaan para sa pangangampanya, gaya ng mga tauhang may mga job order at contractual.
Kasabay nito, nilinaw ni Briones na nananatiling boluntaryo at hindi sapilitan ang gagawing pagsisilbi ng mga guro sa eleksyon.
Gayunman, tiniyak ng kalihim na ang mga guro na magseserbisyo sa halalan ay pagkalooban ng mas mataas na bayad at mas maraming benepisyo.