Ligot at misis, absuwelto sa tax evasion

Pinawalang sala ng Court of Tax Appeals si dating military comptroller Jacinto Ligot at ang kanyang misis na si Erlinda sa kasong multi-million tax evasion.

Ngunit sinabi ng Third Division na maaari pa ring isulong ng Bureau of Internal Revenue (BIR) ang civil aspect ng kaso para makolekta ang kakulangan sa income taxes ng magasawa na diumano’y umaabot sa kabuuang P400 milyon para sa mga taon mula 2001 hanggang 2004.

“It is well-settled that the taxpayer’s obligation to pay the tax is an obligation that is created by law and does not arise from the offense of tax evasion,” saad sa 83-pahinang desisyon.

Sinabi ng mga abogado ng BIR na iaapela nila ang hatol.

Inakusahan ang mag-asawa ng paghahain ng maling income tax returns at Statements of Assets Liabilities and Networth (SALN) mula 2001 hanggang 2004 na idinedeklara ang kinita mula sa kanilang mga sahod, sa halip na ang kabuuang halaga ng kanilang naipong kayamanan na mahigit P400M sa loob ng apat na taon.

Inakusahan din sila ng pagbili ng undeclared real estate properties sa Metro Manila at sa mga lalawigan at pagkakaroon ng malaking bank deposits na diumano’y higit sa kanilang lehitimong kinikita.

May hiwalay na kaso din si Ligot sa Sandiganbayan na graft at seizure proceedings of assets na diumano’y nabili niya noong siya ay treasurer ng Armed Forces of the Philippines.