Ilang gamot, supplements, nakatutulong sa sperm health

MAKATUTULONG sa mga lalaking dumaranas ng infertility ang pag-inom ng ilang gamot at nutritional supplements upang mapabuti ang kalidad ng kanilang semilya, pero halos walang patunay na garantisado itong mauuwi sa pagkakaroon ng anak, ayon sa isang research review.

May isa sa walong pareha ang mabibigong magkaanak makalipas ang isang taon ng pagtatangkang makabuo at sumubok ng medical treatment para sa infertility, ayon sa mga researchers ng European Urology. Bagamat karamihan sa mga kasong ito ay lalaki ang may problema, walang malinaw na impormasyon kung aling gamot at supplements ang makatutulong upang mapagibayo ang kalidad at dami ng semilya.

Para sa bagong analysis, sinuri ng mga researchers ang mga datos mula sa 61 experiments na tumukoy sa pagiging epektibo ng iba’t ibang gamot at supplements para mapabuti ang semen parameters at mapalaki ang tyansang magkaanak.

Partikular nilang sinuri ang mga mga pagbabago para sa mas malaking tyansa ng pagkakaroon ng anak: sperm concentration, o ang dami ng nailalabas na semilya; sperm morphology, o ang dami ng semilyang may angkop na sukat at hugis; at motility, o ang kakayahan ng semilya na maglakbay sa female reproductive tract para marating ang egg cell.

“This systematic review has identified several medical and nutritional treatments options that appear to improve semen parameters,” sabi ng senior study author na si Dr. Muhammad Imran Omar, ng University of Aberdeen sa United Kingdom. “In spite of this, there are limited data suggesting pregnancy and live birth rates are increased.”

Ang Coenzyme Q10, isang nutritional supplement na nagsisilbing antioxidant at karaniwang gamot sa sakit sa puso, ay iniuugnay sa pagpapasigla ng sperm count, motility at hugis batay tatlo hanggang apat na pag-aaral sa nakalipas na tatlo hanggang anim na buwan. Subalit ang kalidad ng ebidensiya ay itinuturing na “low”, ayon sa mga researchers.

Sinuri naman ng anim na pag-aaral ang mga nutritional supplements na may L-carnitine. Napag-ibayo nito ang sperm count at motility, pero hindi ang sukat at hugis ng sperm. Sa kabuuan, “very low certainty” din ang resulta nito.

Ang follicle-stimulating hormone (FSH) para sa kalalakihan, na nakapagpapadami ng produksiyon ng sperm at egg cells, ay iniuugnay sa mataas na pregnancy rates sa limang pag-aaral, pero mababa rin ang kasiguruhan ng ebidensiyang nakalap nito. Napasisigla man ng FSH ang bilang at hugis ng sperm, pero hindi ang motility.

Ang Pentoxifylline, gamot para mapag-ibayo ang daloy ng dugo sa mga may sakit sa ugat, ay nakatutulong sa sperm count, motility at hugis sa tatlong bagong pag-aaral. Pero ikinokonsidera ng mga researchers ang ebidensiya na may low-certainty.

“Most of the studies have only investigated changes to sperm quality and not whether men who are given these interventions are more likely to get their partner pregnant,” sabi ni Dr. Allan Pacey, andrology researcher sa University of Sheffield sa United Kingdom, na hindi kasama sa pag-aaral.

“It is a logical assumption that if sperm quality is improved that more babies will follow,” sabi ni Pacey. “But it is just that: an assumption.”