Online expenses ng kandidato, babantayan
Sa unang pagkakataon, gagamitin ng Commission on Elections (Comelec) ang social media regulations upang mabantayan ang gastos ng mga kandidato sa pangangampanya.
Ito ay matapos mapansin ng Comelec na mas malaking halaga ang ginugugol ng mga kandidato sa online platforms upang impluwensiyahan ang mga botante, sinabi ni Comelec Spokesman James Jimenez sa isang panayam.
“The candidates saw how big social media’s effect is. The tendency now is that they spend big on social media advertising. The problem is, social media is not regulated. And if it’s not regulated, that means they can get away with hidden expenses that they don’t have to report,” paliwanag ni Jimenez.
Ayon kay Jmenez, lahat ng kandidato ay kinakailangang magsumite ng links sa kanilang online platforms, na tutulong sa Comelec upang matukoy kung sinong kandidato ang gumagamit ng social media sa pangangampanya.
Gamit ang mga links, susuriin ng Comelec ang mga record na ibibigay ng mga social media platforms upang matukoy ang halaga na nagagastos ng kandidato sa pangangampanya roon.
Kinakailangan ding isama ng mga kandidato ang kanilang online expenses sa kanilang Statement of Contributions and Expenditures (SOCE).
Kasabay nito, nilinaw kahapon ng Comelec na hindi maaaring magpaskil ng campaign materials sa mga pasilidad ng Light Rail Transit (LRT) at sa iba pang government transport facilities.
Ayon kay Jimenez, mahigpit na ipinagbabawal ang paglalagay ng campaign materials ng mga kandidato sa mga government-run infrastructure, gaya ng LRT at Metro Rail Transit (MRT)-Line 3.
“Bawal maglagay ng advertisement sa anumang government-run means of transportation. We will be coordination with them [Department of Transportation] to address this. Puwede natin ipatigil ‘yan,” ani Jimenez.
Una nang sinabi ng Comelec sa simula sa Huwebes, Pebrero 28, ay sisimulan na ng task force ang pagbabaklas sa mga illegal campaign materials na hindi nakatutupad sa takdang sukat at wala sa common poster areas.