ML extension, ok sa SC
SA ikatlong pagkakataon, ipinasiya ng Supreme Court (SC) na gawing legal o naaayon sa batas ang pagpapalawig (extension) ng martial law sa Mindanao. Para sa maraming mamamayan, mabuti ang ML sa buong Mindanao upang mapigilan ang karahasan at pagpatay ng mga terorista at iba pang kriminal.
Kung susuriin nating mabuti, hanggang ngayon ay nagaganap pa ang pagpapasabog at paghahagis ng granada gayong umiiral ang martial law. Lalo na sigurong magiging marahas, matapang at mabagsik ang mga tauhan ng Abu Sayyaf Group (ASG), at Bangsamoro Islamic Freedom Fighters (BIFF) na kaalydo ng ISIS kung walang ML sa Katimugan.
Kung minsan ay tama rin si Pangulong Rodrigo Roa Duterte (PRRD) sa pagbatikos sa mga paring katoliko. May mga paring ginagamit ang kanilang puwesto sa gawaing sekswal, pangaabuso at pangangawarta.
Sa banner headline ng BALITA noong Miyerkules, ganito ang nakasulat: “Paring ‘Pedo’, arestado.” Ang paring “pedo” o pedophile ay isang 77anyos na Amerikano. Batay sa ulat, ang Amerikanong matanda na at may “kalibugan” pa, ay nangmolestiya ng 50 katao, karamihan ay altar boys o mga batang sakristan. Ang tarantadong “pedo priest” ay si Father Kenneth Pius Hendricks.
Kung may ganito mang uri ng paring katoliko, hindi marahil makatwiran kay PRRD na lahatin ang mga pari bilang mang-aabuso, manghahalay at gumagawa ng katarantaduhan. Hindi rin marahil tama ang ating Pangulo na akusahan ang Simbahang Katoliko na “ipokrito” sapagkat inaamin naman ng Simbahan at ng mga obispo na sa kanilang hanay ay mayroong tiwali at bulok na mga pari.
Mismong si Pope Francis ang naghahayag sa buong mundo ng katarantaduhan at gawaing-seksuwal ng ilang pari. Samakatuwid, aminado ang Catholic Church na may mga pari, o obispo na sa halip na mag-akay sa mga mananampalataya sa tuwid na landas, ay sila pa ang nagbubulid sa bangin ng kapariwaraan.
Halimbawa bang may isang suwail at tiwaling miyembro sa pamilya ni Mano Digong, aakusahan ba nating lahat na ang kanyang anak ay suwail at tiwali, na ang kanyang pamilya ay masama? Hindi tama na sabihing ang pamilya ay masama nang dahil lang sa kagagawan ng isang anak na naligaw ng landas.
oOo
Ganap nang ipinagbawal ng Food and Drug Administration (FDA) ang Dengvaxia vaccine sa Pilipinas. Inihayag ng FDA na pinawalang-saysay nito ang certificate of product registration (CPR) ng anti-dengue vaccine. Makahihinga na nang maluwag ang mga nanay ngayon para hindi pabakunahan ang mga anak ng Dengvaxia.
Welcome sa Department of Health
(DoH) ang desisyon ng FDA. Sinabi ni DoH Undersecretary Eric Domingo na ito ang inaasahan nilang mangyayari, hindi na puwedeng gamitin ang Dengvaxia sapagkat ang produktong ito ay walang kumpletong impormasyon upang malaman kung mabisa o hindi.
Sa ngayon, bumabalik na ang tiwala ng mga nanay sa iba pang uri ng mga bakuna, lalo na sa bakuna sa tigdas o anti-measles. Umiiral pa rin sa maraming panig ng bansa ang tigdas, at batay sa huling ulat, may 146 na ang namamatay dahil sa tigdas. Mga nanay, pabukanahan na ang mga anak!