‘Kubrador’ huli sa illegal gambling
Inaresto ng National Capital Region Police Office (NCRPO) ang isang babae, na nahuli sa aktong nangongolekta ng taya para sa illegal numbers game, sa Muntinlupa City, nitong Biyernes.
Dinampot ng mga tauhan ng NCRPO-Regional Special Operations Unit (RSOU) si Susan Ruz, 54, tubong Nueva Ecija at residente ng Quezon Street, Barangay Poblacion, Muntinlupa City.
Ayon kay NCRPO Director Guillermo Eleazar, si Ruz ay inaresto nang makatanggap ng tip ang awtoridad hinggil sa umano’y illegal gambling operations ng suspek.
Aniya, nagsagawa ng surveillance operation ang grupo ng NCRPO-RSOU laban kay Ruz sa Quezon St., bandang 5:30 ng hapon.
Ang suspek, na nakumpirmang hindi tauhan ng Philippine Charity Sweepstakes office (PCSO), ay namataang nangongolekta ng taya sa sugal sa lugar, sabi ni Eleazar.
Isang undercover ang lumapit kay Ruz at nagkunwaring tatay. Tinanggap ng suspek, ayon kay Eleazar, ang pera mula sa undercover agent.
Nang sumenyas na ang undercover agent, lumabas na ang arresting team at inaresto si Ruz.
Sa 45-second video mula sa NCRPO, mapapanood si Ruz na pumipiglas sa mga umaaresto. Gayunman, wala na siyang nagawa nang bitbitin siya ng mga pulis sa van at dalhin sa presinto.
Nakuha kay Ruz ang P358 taya, P20 na marked money; bet result card, dalawang ballpens, booklet collection report form, sling bag, at isang cellular phone.
Idiniretso si Ruz sa NCRPO headquarters sa Camp Bagong Diwa, Taguig City at kinasuhan sa paglabag sa Presidential Decree 1602 (illegal gambling), na inamyendahan ng RA 9287 (illegal numbers game).