Obispo ng Caloocan, may death threats

Kinumpirma kahapon ni Caloocan Bishop Pablo David na nakatanggap siya ng mga banta sa kanyang buhay.

Sa isang panayam, sinabi niya na nagsimula siyang makatanggap ng death threats dalawang linggo na ang nakalilipas.

“I have been receiving them but I do not know who they are coming from,” ani David sa panayam.

Nang tanungin kung may kinalaman ito sa hayagan niyang pagkontra sa war on drugs, sumagot siya na: “I’d say your guess is as good as mine.”

Sa kabila ng mga banta sa kanyang buhay, walang balak si David na limitanan ang kanyang mga galaw at idiniin na walang makapipigil sa pagganap niya sa kanyang mga tungkulin bilang obispo.

Nitong Linggo, inihayag ni Pangulong Duterte na nagpadala ng mensahe si Cardinal Luis Antonio Tagle kay dating presidential aid Bong Go kaugnay sa impormasyong kanyang natanggap sa death threats kay Bishop David at sa iba pang mga pari mula sa isang tao na nagsasabing nagtatrabaho para sa pamilya ng Pangulo.

Umaasa ang mga pari na seryoso si Pangulong Duterte nang umapela siya sa publiko na huwag saktan ang mga pari.

“Lets hope he is serious,” ani Bishop Buenaventura Famadico, chairman ng Catholic Bishops’ Conference of the Philippines Episcopal Commission on Clergy, sa isang panayam.

“I hope he is not joking and is finally serious in his statement,” sabi naman ni Sorsogon Bishop Arturo Bastes.