2019 Earth Hour: Protesta vs polusyon sa plastic

HANGAD ng World Wide Fund for Nature (WWF) Philippines, conservation organization, na higit pang makakuha ng suporta sa publiko para sa batas hinggil sa plastic waste management, upang matugunan ang environmental degradation at biodiversity loss mula sa polusyon sa plastic.

Sa Marso 30, pangungunahan ng WWF Philippines ang pagdiriwang ng Pilipinas ng 2019 Earth Hour (EH) sa Makati City, na nakaangkla sa kampanya ng organisasyon laban sa mga single-use plastics.

“For this year, we’re emphasizing what and how everybody can be part of the crusade to save the planet,” pahayag ni WWF Philippines president at CEO Joel Palma, sa paglulunsad ng EH ngayong taon sa Pasig City nitong Huwebes.

Nasa ikatlong puwesto ang Pilipinas sa nangungunang plastic polluters sa karagatan at ang patuloy na pagkasira ng kalikasan dulot ng plastic ay nangangailangan ng kolektibong aksiyon para sa suliranin, aniya.

“We Filipinos must unite and create concrete steps to stop this worsening situation,” ani Palma.

Aniya, mahalaga ang kalikasan sa buhay ng tao kaya ang pagpigil sa pagdami ng mga basurang plastic na maaaring magdulot ng polusyon ng kapaligiran “is a big step towards a greener, more sustainable planet.”

Ang EH ay isang grassroots movement, na isinusulong ng punong organisasyon ng WWF Philippines sa buong mundo taun-taon, upang hikayatin at palakasin ang bawat indibiduwal, samahan at pamahalaan na gumawa ng konkretong aksiyon para sa mundo.

Sa pamamagitan ng pagpatay ng ilaw sa loob ng isang oras, ipinapakita ng mga kaisa sa EH ang suporta sa bid.

Ayon sa WWF Philippines, magaganap ang aktuwal na 2019 EH switch-off lights sa bansa sa Marso 30, dakong 8:30 ng gabi.

“Everyone all over the Philippines is encouraged to switch off non-essential lights from 8:30 p.m. to 9:30 p.m. in solidarity with millions around the world who’ll do the same,” panawagan ng samahan.

Magaganap naman ang aktuwal na selebrasyon ng 2019 EH sa Makati’s Globe Circuit Event Grounds simula 5 ng hapon hanggang 10 ng gabi, ayon sa WWF Philippines.

Tampok naman sa pagdiriwang ang iba’t ibang booth, aktibidad at pagtatanghal na nagbibigay pugay sa Earth, gayundin ang main switch-off.

Sinabi ng WWF Philippines na sa mahigit 10 taon, nakapagbigay inpirasyon na ang EH sa mga indibiduwal, komunidad, negosyo at samahan sa mahigit 180 bansa at teritoryo upang gumawa ng aksiyon para sa kalikasan.

“More recently, EH has focused on raising awareness and inspiring conversations on why nature matters -- the movement recognizes (the) role of individuals in creating solutions to the planet’s most pressing environmental challenges and harnesses (the) collective power of its millions of supporters to build a sustainable future for all,” dagdag pa ng WWF Philippines.